Astanada tirkelmegen 40-tan astam moped pen elektrli velosıped anyqtaldy
ASTANA. KAZINFORM — Astanada «Qaýipsiz jol» respýblıkalyq jedel-profılaktıkalyq is-sharasy aıasynda tirkelmegen 40-qa jýyq kólik quraly anyqtaldy.
Jedel-profılaktıkalyq is-shara «Zań men tártip» qaǵıdatyn iske asyrý aıasynda ótip jatyr. Onyń barysynda moped pen elektrli velosıped júrgizýshileriniń, sondaı-aq jaıaý júrginshilerdiń jol erejelerin saqtaýyna erekshe nazar aýdarylyp otyr.
Polıtsııa qyzmetkerleri kún saıyn reıdtik jáne profılaktıkalyq is-sharalar ótkizip, jol qozǵalysyna qatysýshylarǵa zańnama talaptary men olardy buzǵany úshin kózdelgen jaýapkershilikti túsindirýde. Eń jıi tirkeletin quqyq buzýshylyqtar qatarynda tirkelmegen mopedter men elektrli velosıpedterdi paıdalaný, júrgizýshi kýáliginsiz kólik basqarý (mindetti bolǵan jaǵdaıda), memlekettik tirkeý nómiriniń bolmaýy, sondaı-aq jol belgileri, baǵdarsham sıgnaldary jáne Jol qozǵalysy erejeleriniń ózge de talaptaryn saqtamaý bar.
Jedel-profılaktıkalyq is-shara barysynda tirkelmegen 40-qa jýyq kólik quraly anyqtaldy. Olardyń ıeleri qoldanystaǵy zańnamaǵa sáıkes jaýapkershilikke tartyldy.
Polıtsııa departamenti kólik quraldaryn mindetti túrde tirkeý, zań talaptaryn saqtaý jáne jolda jaýapkershilikpen áreket etý qaýipsizdiktiń basty sharttary ekenin eske saldy. Jol qozǵalysy erejelerin buzý júrgizýshilerdiń ózine de, ózge jol qozǵalysyna qatysýshylarǵa da qaýip tóndiredi.
«Qaýipsiz jol» jedel-profılaktıkalyq is-sharasy aıasyndaǵy profılaktıkalyq jumystar jalǵasýda. Olar jol-kólik oqıǵalarynyń aldyn alýǵa, jol qozǵalysy tártibin kúsheıtýge jáne qaýipsiz júris-turys mádenıetin qalyptastyrýǵa baǵyttalǵan.
Aıta ketelik elektrsamokat pen mopedti kez kelgen jerge qaldyrýǵa bolmaıdy.
