Astanada trıatlonnan jarys bastaldy
ASTANA. QazAqparat - 17-18 maýsym kúnderi Astananyń Trıatlon saıabaǵynda trıatlonnan QR kýbogynyń úshinshi kezeńi ótýde. Sharaǵa kásibı sportshylar men áýesqoılar qatysyp jatyr, dep habarlaıdy qalalyq ákimdiktiń baspasóz qyzmeti.
Jarysty Qazaqstan trıatlon federatsııasy, Astana qalasynyń dene shynyqtyrý jáne sport basqarmasy, sporttyq-buqaralyq is sharalardy ótkizý dırektsııasy uıymdastyryp otyr. QR Kýbogynyń úshinshi kezeńi QR mádenıet jáne sport mınıstrliginiń sport jáne dene shynyqtyrý isteri Komıtetiniń, Astana qalasy ákimdiginiń tikeleı qoldaýy boıynsha ótkizildi.
- Búgin bizde sýper-sprıntten QR Kýbogynyń úshinshi kezeńi ótýde. Qatysýǵa nıet bildirgenderdiń qatary kóp. Bir trıatlonda úsh sport túri biriktirilgen. Sol sebepten, bolashaqta, Astanada atalǵan sport túrine degen qyzyǵýshylyq arta túsedi dep oılaımyz. Sportshylar medıtsınalyq baqylaýdan ótip, densaýlyqtaryn tolyq tekseredi, sonymen qatar júze bilýleri tıis, júgirip, velosıpedte tebe alýlary da mańyzdy, - deıdi Astana ákimdiginiń sporttyq-buqaralyq is sharalardy ótkizý dırektsııasynyń basshysy Azamat Imashev.
Jarystyń alǵashqy kúni jeńiske 30 kásibı sportshy talassa, ekinshi kúni - 120 áýesqoı ózara baq synaıdy. Qatysýshylar eldiń ár óńirinen jınaldy. Kásibı sportshylar sýper-sprıntten 10 shaqyrym 300 metr qashyqtyqty baǵyndyrdy: 300 metr - júzý, 8 shaqyrym - velojarys jáne 2 shaqyrym - júgirý.
Erteń, 18-maýsym kúni jalpy uzyndyǵy 25 shaqyrym 750 metr qashyqtyq boıynsha sprıntke kásibılermen qatar áýesqoılar da shyǵady. Qatysýshylar 750 metr júzýden, 20 shaqyrym velojarys túrinen jáne 5 shaqyrym júgirýden baqtaryn synaıdy.
Qazaqstan men búkil álemde «áýesqoılar» sanaty boıynsha trıatletter sany artyp keledi. Osyǵan deıin trıatlonnan doda Shymkentte uıymdastyrylyp, oǵan 200-den astam adam qatysqan bolatyn.
