Astanada trıatlon saıabaǵy ashyldy (FOTO)
ASTANA. QazAqparat - Elorda ákimi Áset Isekeshev jáne BI Group basshysy Aıdyn Rahymbaev biregeı sporttyq nysan - Astana trıatlon saıabaǵynyń ashylýyna qatysty.
Ashyq aspan astyndaǵy bul keshen 18 jasqa tolǵan Astanamyzǵa tartý, dep habarlady BI Group Development baspasóz qyzmeti.
Eki aı buryn ǵana bos jatqan bul orynda úlken qurylys júrgizildi. Aspan astyndaǵy 45 gektar aýmaqta biregeı sporttyq nysan salyndy. Astana turǵyndary men qonaqtar munda júgirip, velosıped teýip, sýda júze alady.
«Meniń oıymsha, bul qala ishindegi eń tanymal keshenge aınalaıyn dep tur. Munda trıatlonmen aınalysýǵa bar jaǵdaı jasalǵan jáne jýyrda júgirý jáne trıatlon boıynsha 2 korporatıvtik mektep ashylady, dedi Aıdyn Rahymbaev.
- Astana trıatlonmen aınalysýǵa múmkindik týǵyzǵan birinshi qala, endi astanalyq trıatlonshylardyń qatary kóbeıedi dep úmittenemin. Mereke qutty bolsyn jáne mundaı tartýy úshin kompanııaǵa úlken alǵys bildiremin, - dedi QR kásibı jáne áýesqoı trıatlon federatsııasynyń prezıdenti, ulttyq quramanyń bas bapkeri Murathan Toqmádı.
Nysannyń ashylý qurmetine qala ákimi Áset Isekeshev sımvoldyq jarysynyń tusaýyn kesti. Keıin qala ákimi Trıatlon parkti, Strıt Vork aýtpen aınalysatyn alańqaıdy qarap shyǵyp, saıabaqty balalar alańqaıymen, tennıs kortymen, jeńil atletıka manejimen tolyqtyrýdy usyndy.
