Astanada TransLogistica Kazakhstan kórmesine 20 elden 230 kompanııa qatysty
ASTANA. KAZINFORM – TransLogistica Kazakhstan halyqaralyq kórmesi bıyl 29-ret uıymdastyrylyp otyr. Astanadaǵy EXPO halyqaralyq kórme ortalyǵynda ótip jatqan sharaǵa 20 elden 230 kompanııa qatysyp jatyr.
Kórme aıasynda kólik ınfraqurylymy, halyqaralyq júk tasymaly, qoıma logıstıkasy jáne salany damytý máseleleri talqylanyp jatyr.
Kórme alǵash ret 1997 jyly ótkizilgen. Sodan beri Almaty men Astanada uıymdastyrylyp keledi. Bul joly 36 jańa qatysýshy qosyldy. Alǵash ret 700-den astam kompanııany biriktiretin Túrkııanyń Qyzmetter eksporttaýshylary qaýymdastyǵy qatysyp otyr. Sonymen birge Belarýs, Latvııa, Lıtva, Túrkııa jáne Estonııa ulttyq toptary óz elderiniń kompanııalaryn tanystyrady.
Bıylǵy kórmeniń ekspozıtsııasynda teńiz porttary men temirjol ákimshilikteri, logıstıkalyq ortalyqtar, kólik tehnıkasyn óndirýshiler, vagon jasaý jáne jóndeý kásiporyndary, qoıma jabdyqtaryn jetkizýshiler óz sheshimderin usynyp jatyr. Júk óńdeý men saqtaý tehnologııalaryna, óndiristik jáne logıstıkalyq úderisterdi avtomattandyrýǵa arnalǵan qural-jabdyqtar da tanystyrylǵan.
Uıymdastyrýshylardyń aıtýynsha, iskerlik baǵdarlama úsh kúnge josparlanǵan. Onyń aıasynda kólik salasyndaǵy áıel kóshbasshylardyń róli, kadr daıarlaý, tálimgerlik, kúrdeli jobalyq júkterdi tasymaldaý jáne qoıma logıstıkasy máseleleri talqylanady. Sondaı-aq halyqaralyq kólik dálizderi men Qazaqstannyń tranzıttik áleýetin damytýǵa arnalǵan kezdesýler ótedi.
– Búgin «Jańa dáýirdiń kóshbasshy áıelderi» atty sessııa ótti. Onda kólik salasyn damytýdaǵy áıelderdiń róli, kadr daıarlaý jáne tálimgerlik máseleleri talqylandy. Aldaǵy kúnderi qoıma logıstıkasyna arnalǵan konferentsııada zamanaýı qoımalardyń qandaı bolýy kerektigi jáne olardyń turaqty jumys isteýi úshin ne qajet ekeni sóz bolady. Sońǵy kúni sarapshylar kólik aptasynyń qorytyndysyn shyǵaryp, aldaǵy jobalardy talqylaıdy, – dedi kórme uıymdastyrýshysy Gúlzana Ábdýsháripova.
Aıta keteıik, kórme 16 qazanǵa deıin jalǵasady. Kelesi jyly TransLogistica Kazakhstan kórmesin Almatyda ótkizý josparlanǵan. Bul sharanyń 30-shy mereıtoılyq kórmesi bolmaq.
Buǵan deıin qazaqstandyq 20 kompanııa «INNOPROM. Belarýs» halyqaralyq kórmesinde ınnovatsııalyq ónimderin tanystyrǵany týraly jazǵan edik.
