Astanada tozyǵy jetken jylý júıesi jańǵyrtylyp jatyr
ASTANA. KAZINFORM – Jyl saıyn Astana qalasyndaǵy jylý júıesi ret-retimen jańǵyrtylyp jatyr. Áıtpese tozyǵy jetken qubyrlar apatty jaǵdaıdyń týyndaýyna túrtki bolyp, turǵyndar zardabyn tartatyny aıtpasa da túsinikti. Osy rette, «Astana-Teplotranzıt» AQ basshylyǵy press-týr barysynda ınvestıtsııalyq baǵdarlamalar sheńberinde atqarylǵan jumystardy kórsetti.
Atalǵan kásiporynnyń basqarma tóraǵasynyń óndiris jónindegi orynbasary Marat Seıtqazıevtiń aıtýynsha, ınvestbaǵdarlamalyq jobalar byltyr bastaý alǵan.
«Jylý júıesinde ótken ǵasyrdyń 90-jyldarynan beri qoldanylyp kele jatqan qubyrlar az emes. Saldarynan apatty jaǵdaılar jıi tirkeledi. Bul rette, byltyr Petrov kóshesi, 18/1 mekenjaıy boıynsha 8(42)-QT jylý trassasyn jáne Ýálıhanov kóshesi, 9/1, 9/2 mekenjaıyndaǵy jylý trassasyn qaıta jańartý jumystary sátti aıaqtaldy. Bul – jylý júıesindegi apattyń aldyn alyp, turǵyndarǵa sapaly qyzmet kórsetýge múmkindik beredi», - dedi ol.
Bıyl Jırentaev kóshesi, 14-úıden bastap 16-úıge deıin jylý trassasyn qaıta jańartý jumystary qolǵa alynǵan. Nátıjesinde 791 metr eskirgen qubyrlar jańartylǵan. Joba quny – 363 mıllıon teńge.
Sondaı-aq Saryarqa kóshesi, 17 mekenjaıy boıynsha turǵyn úı mańyndaǵy jylý kamerasynan bastap Saryarqa dańǵyly, 15, 17 úılerge deıin boıynsha jylý trassasyn qaıta jańartý jumystary aıaqtalýǵa jaqyn.
Belgili bolǵandaı, tóselip jatqan qubyrlar otandyq ónimder eken. Sapasyna toqtalsaq, 25 jylǵa deıin qyzmet kórsetýge qaýqarly.
Aıta keteıik, «Astana-Teplotranzıt» AQ ıeliginde 1009, 253 km jylý trassasy bar. Olardyń qalypty jumys isteýi úshin aldaǵy ýaqytta da ınvestıtsııalyq baǵdarlamalar sheńberinde jańǵyrtý jumystary jalǵasyn tappaq.
