Astanada tórtinshi Pravoslavıe shirkeýi salynady
Kezdesý barysynda Patrıarh Qazaqstan Respýblıkasynyń Prezıdenti Nursultan Nazarbaevtyń qoǵamdaǵy konfessııaaralyq kelisimdi nyǵaıtýǵa baǵyttalǵan salıqaly saıasatyn erekshe atap ótti. Qazaqstan Respýblıkasyndaǵy memleket pen dinder arasyndaǵy, onyń ishinde pravoslav dinimen de aradaǵy ózara suhbat syndarly túrde damyp kele jatqandyǵyn erekshe atap ótti.
D. Káletaev Memleket basshysynyń tapsyrmasymen Astanada tórtinshi Pravoslavıe shirkeýin salý týraly sheshim qabyldanǵanyn jetkizdi. Qazirgi ýaqytta jańa ǵıbadathananyń qurylysyn júrgizý úshin jer telimi anyqtaldy. Qurylys jobasyn ázirleý jumystary júrgizilýde.
Darhan Káletaev qazirgi ýaqytta talqylaýdan ótip jatqan dinı qyzmet jáne dinı birlestikter týraly zań jobasyna pravoslav shirkeýi ókilderiniń de qatysqanyn aıtty. «Zań jobasyna engiziletin ózgertýler men tolyqtyrýlar dindi destrýktıvti maqsatta paıdalaný jaǵdaılaryn barynsha azaıtýǵa jáne dinı radıkalızmnyń aldyn alýǵa baǵyttalǵan», - dep atap ótti mınıstr.
Patrıarh memlekettiń din salasyndaǵy negatıvti protsesterdi baqylaý qajettigimen kelisetinin atady.
Orys pravoslav shirkeýiniń basshysy jat dinı ıdeologııanyń aldyn alý, patrıottyq tárbıe berý jáne rýhanı tulǵany qalyptastyrý maqsatynda jalpy bilim beretin mektepterde din taqyrybyndaǵy pánderdi oqytý tájirıbesimen bólisti.
Darhan Káletaev Patrıarh Kırıllge dinaralyq jáne mádenıetaralyq dıalogty damytýǵa qosqan úlesi úshin alǵysyn bildirip, Orys pravoslavıe shirkeýiniń ókilderine Astanada ótken dinaralyq forýmdardyń, sondaı-aq atalǵan forýmdardyń hatshylyǵy men jumys tobynyń qyzmetine qatysqany jáne qoldaý bildirgeni úshin rızashylyǵyn jetkizdi.
Kezdesý sońynda Máskeý jáne búkil Reseı Patrıarhy Kırıll Reseıde Qazaqstannyń turaqty damýyna jáne onyń halyqaralyq arenadaǵy bedeliniń nyǵaıýyna qýanatynyn aıta kele, Qazaqstan bıliginiń konfessııaaralyq jáne etnosaralyq kelisimdi nyǵaıtýǵa baǵyttalǵan saıasatyna tolyq qoldaý bildirdi.
