Astanada tórt zańsyz fıtozerthananyń qyzmeti toqtatyldy
ASTANA. KAZINFORM — Jyl basynan beri qala aýmaǵynda turǵyn úılerde uıymdastyrylǵan tórt zańsyz fıtozerthananyń qyzmeti toqtatyldy. Tergeý barysynda kúdiktilerdiń páterler men jeke bólmelerdi arnaıy jabdyqtap, quramynda esirtki zattary bar ósimdikterdi zańsyz ósirýge jaǵdaı jasaǵany anyqtaldy. Olar arnaıy satyp alynǵan tehnıkalyq quraldardyń kómegimen ósimdikterdiń ósýine qajetti mıkroklımatty qoldan jasap otyrǵan.
Polıtsııanyń málimetinshe, keıbir jaǵdaılarda bul maqsatta jeke páterler, arnaıy bólingen bólmeler, sondaı-aq turǵyn úılerdiń qaıta jabdyqtalǵan aýmaqtary, onyń ishinde shkaftar men oqshaýlanǵan oryndar paıdalanylǵan. Bul oryndarǵa jaryqtandyrý, jeldetý jáne ylǵaldylyqty retteý júıeleri ornatylǵan.
— Jedel-izdestirý is-sharalary barysynda polıtseıler zańsyz áreketke qatysy bar kúdiktilerdi anyqtap, ustady. Júrgizilgen tintýler kezinde quramynda esirtki zattary bar ósimdikter, daıyn esirtki quraldary jáne olardy ósirýge arnalǵan arnaıy jabdyqtar tárkilendi, — delingen habarlamada.
Zańsyz aınalymnan alynǵan esirtki quraldarynyń jalpy salmaǵy 20 kelige jýyq boldy.
Bul derekter boıynsha qylmystyq ister qozǵalyp, sotqa deıingi tergep-tekserý júrgizilip jatyr.
Polıtsııa quramynda esirtki zattary bar ósimdikterdi zańsyz ósirý, sondaı-aq esirtki quraldaryn daıyndaý, saqtaý jáne ótkizý Qazaqstan Respýblıkasynyń zańnamasyna sáıkes qylmystyq jaýapkershilikke ákep soǵatynyn eskertti.
Eske salaıyq, buǵan deıin shildeniń 10 kúninde Qazaqstanda 121 keliden astam sıntetıkalyq esirtki tárkilengenin jazǵanbyz.
