Astanada tórt aı ishinde AITV ınfektsııasyn 130 adam juqtyrdy
ASTANA. KAZINFORM – Álemde jyl saıyn mamyr aıynyń úshinshi jeksenbisinde halyqaralyq JITS-ten qaıtys bolǵandardy eske alý kúni atalyp ótedi. Bıyl bul kún 18 mamyrǵa sáıkes kelip otyr.
Astana qalasyndaǵy adamnyń ımmýn tapshylyǵy vırýsynyń (VICh) aldyn alý ortalyǵynyń málimetinshe, qazirgi tańda elordada aýrýdy erte kezeńde anyqtaý men emdeýge baǵyttalǵan birqatar emdik-profılaktıkalyq shara qolǵa alynǵan.
- AITV ınfektsııasyn erte anyqtaý adamnyń ımmýndyq júıesiniń jaı-kúıin baqylaýǵa jáne qosalqy ınfektsııalardyń damýyn boldyrmaýǵa múmkindik beredi. Sol sebepti qala turǵyndaryna AITV-ǵa testileýden erkin ótýge jaǵdaı jasalǵan. 2025 jyldyń alǵashqy tórt aıynda 160 myńnan astam adam ınfektsııaǵa tekserýden ótti. Bul jalpy halyqtyń shamamen 12 paıyzyn quraıdy, - dep habarlady ortalyqtan.
Sońǵy on jylda antıretrovırýstyq terapııamen qamtý kórsetkishi 5 ese ósken. Qazirgi ýaqytta AITV-men tirkeýde turǵan adamdardyń 93%-y qajetti em alyp jatyr. Vırýstyń anadan balaǵa juǵý kórsetkishi 1%-dan aspaıdy, bul óz kezeginde náresteler arasynda ınfektsııa juqtyrý qaýpin edáýir azaıtady.
- ART-terapııa qoljetimdiliginiń artýynyń arqasynda JITS-ten ólim-jitim deńgeıi ósken joq. Ol burynǵy kórsetkish deńgeıinde saqtalyp otyr, - deıdi mamandar.
Halyqaralyq JITS-ten qaıtys bolǵandardy eske alý kúnine oraı AITV ınfektsııasynyń aldyn alý ortalyǵy, qoǵamdyq densaýlyq saqtaý basqarmasy, úkimettik emes uıymdar, jastar densaýlyq ortalyqtary jáne Salaýatty ómir saltyn qalyptastyrý ortalyǵy birlesip, birqatar is-shara ótkizdi. Atap aıtqanda, «Han Shatyr» saýda ortalyǵynda halyqqa arnalǵan Ashyq esik kúni jáne ekspress-test júrgizý aktsııasy, Qazaq agrotehnıkalyq ýnıversıtetiniń stýdentterine arnalǵan túsindirý sharalary uıymdastyryldy.
Mamandardyń aıtýynsha, tek Astana qalasynyń ózinde 2025 jyldyń alǵashqy tórt aıynda AITV ınfektsııasynyń 130 jańa faktisi tirkelgen. Onyń 60%-y 20-39 jas aralyǵyndaǵy azamattardan anyqtalǵan.
Eske salsaq, osyǵan deıin ShQO-nyń 3 birdeı aýdanynda alǵash ret AITV juqtyrǵandar tirkelgeni habarlanǵan.