Astanada tórt adam qaraqshylyq shabýyl jasaǵany úshin 5 jylǵa sottaldy

ASTANA. KAZINFORM – Astananyń qylmystyq ister jónindegi aýdanaralyq soty qaraqshylyq shabýyl jasaǵany úshin tórt sottalýshyǵa qatysty úkim shyǵardy.

Qylmystyq kodekstiń 192-baby 2-bóligi 1-tarmaǵy boıynsha aıyptalǵan A.A., B.N., B.A. jáne B.E. qylmysty aldyn ala josparlap, rólderdi bólisip, adam kózinen tasa jerde betperde jáne bas kıim kıip, jábirlenýshige shabýyl jasaǵan.

Sot talqylaýy barysynda olar jábirlenýshiniń sol kezde osal jaǵdaıda bolýyn maqsatty túrde paıdalanǵany anyqtaldy. Sottalýshylar aınalany baqylap, jábirlenýshiniń qarańǵy ýaqytta adam az jerde jalǵyz júrgenin baıqap, qylmys jasaý táýekeliniń tómen ekenin baǵalaǵan.

- Shabýyl kezinde jábirlenýshiniń ómiri men densaýlyǵyna qaýipti kúsh qoldanyp, onyń múlkin tartyp alǵan. Sottalýshylardyń kinási jábirlenýshi men kýágerlerdiń aıǵaqtarymen, sot-medıtsınalyq saraptama qorytyndysymen, jedel-izdestirý is-sharalarynyń nátıjelerimen jáne ózge dáleldemelermen rastaldy, - delingen aqparatta.

Prokýror jáne jábirlenýshi sottalýshylarǵa 6 jyl 8 aı merzimge bas bostandyǵynan aıyrý jazasyn surady. Al sottalýshylar men qorǵaýshylary bas bostandyǵynan aıyrýǵa jatpaıtyn jaza taǵaıyndaýdy ótindi.

QK 192-baby 2-bóligi 1-tarmaǵy 5 jyldan 10 jylǵa deıin bas bostandyǵynan aıyrýdy kózdeıdi. Sot jeńildetetin mán-jaı retinde olardyń istegenderine ókinýin, jas erekshelikterin, jaǵymdy minezdemelerin, jábirlenýshige zalaldy erikti túrde óteýin eskerdi. Aýyrlatatyn mán-jaılar anyqtalǵan joq.

Qylmystyń aýyr sanatyna jatatynyn, jábirlenýshiniń orta dárejede zardap shekkenin jáne taraptardyń ustanymyn eskerip, sot ár sottalýshyǵa 5 jyl merzimge bas bostandyǵynan aıyrý jazasyn taǵaıyndady.

Úkim zańdy kúshine engen joq.

Aıta keteıik, Astana polıtsııasy «Tesla Education» ortalyǵyna qatysty aryzdardy qaraýǵa kiristi.