Astanada toptyq estetıkalyq gımnastıkadan el chempıonaty ótip jatyr
ASTANA. KAZINFORM – Astanada toptyq estetıkalyq gımnastıkadan el chempıonaty bastaldy, dep jazdy elorda ákimdiginiń resmı saıty.
Estetıkalyq gımnastıka – Qazaqstanda endi ǵana damyp kele jatqan sport túri. Kórkem gımnastıkaǵa uqsas bul sporttyń ózindik erekshelikteri bar. Birinshiden, saıys barysynda eshqandaı qural qoldanylmaıdy. Ekinshiden, toptyq saıys bolǵandyqtan, komandada kemi 6 adam óner kórsetedi. Úshinshiden, bul sport túrimen aınalysý úshin qatty talap qoıylmaıdy ári kórkem gımnastıkaǵa qaraǵanda uzaq merzimde aınalysýǵa bolady.
«Qazaqstan chempıonaty jylyna bir márte uıymdastyrylady. Bıylǵy jarysqa 8 oblystan sportshylar qatysyp jatyr. Ótken jyly 5 oblystyń sportshylary kelgen, bıyl qatysýshylar qatary artty. Týrnırde uzaq baǵdarlama boıynsha jas erekshelikterine qaraı 260 adam júldege talasyp jatyr. Qysqa baǵdarlama 1,5 mınýtty qamtysa, uzaq baǵdarlama 3,5 mınýtqa deıin jalǵasady. Týrnırdiń nátıjesinde kúzde Gonkongte ótetin Azııa chempıonatyna baratyn úzdikter irikteledi», - dedi jarystyń bas tóreshisi Zaıra Jaqypova.
Aıta keteıik, estetıkalyq gımnastıkadan Qazaqstan quramasy 2019 jyldan bastap jyl saıynǵy álem chempıonatyna turaqty túrde qatysyp keledi. 2022 jyly Aýstrııadaǵy jahandyq dodada komandalyq saıys boıynsha qola júldege ıe bolsa, 2023 jyly Azııa qurlyǵynan Almaty qalasy birinshi márte 16 memlekettiń qatysýymen álemdik básekeni óz jerinde qabyldaýǵa múmkindik aldy. Nátıjesinde jasóspirimder sanatynda Astana qalasynyń «Samuryq» komandasy birinshi ret qola júldeger atanǵan edi.
Estetıkalyq gımnastıkaǵa qatysatyndar tek qana kórkem gımnastıkanyń elementterin ǵana emes, sporttyq gımnastıka, bı jaǵynan da sheberligin shyńdaı alady.
