Astanada topyraqty zańsyz qazý men tasymaldaýǵa baqylaý kúsheıtildi
ASTANA. KAZINFORM — Astanada polıtsııa topyraqty zańsyz qazý jáne tasymaldaý derekterine qarsy baqylaýdy kúsheıtti. Reıdter barysynda birneshe zań buzý faktisi anyqtalyp, arnaıy tehnıka ustaldy.
Polıtsııanyń málimetinshe, quqyq qorǵaý organdary abattandyrý qaǵıdalary men tabıǵat qorǵaý zańnamasynyń saqtalýyn baqylaý maqsatynda Jedel basqarý ortalyǵynyń beınebaqylaý kameralaryn, ushqyshsyz ushý apparattaryn paıdalanyp, turaqty monıtorıng júrgizip keledi. Sonymen qatar qala aýmaǵynda júıeli reıdtik is-sharalar uıymdastyrylyp jatyr.
Keıingi tekserýlerdiń birinde Tóle bı kóshesinde topyraqty zańsyz qazyp, tasymaldaǵan úsh júk kóligi men ekskavator-júk tıegish anyqtaldy.
Taǵy bir derek Esil aýdanynda tirkelgen. Reıd kezinde Howo Sinotruk júk kóliginiń ıesi topyraqty zańsyz tasymaldaǵany belgili boldy.
Bul derekter boıynsha jınalǵan materıaldar Astananyń qorshaǵan ortany qorǵaý jáne tabıǵatty paıdalaný basqarmasyna joldandy.
Polıtsııa mundaı zańsyz áreketterdiń qorshaǵan ortaǵa zııan keltiretinin eskertip, kináliler zańnamaǵa sáıkes jaýapqa tartylatynyn málimdedi. Sondaı-aq azamattardy ekologııalyq quqyq buzýshylyqtar týraly 102 nómirine habarlaýǵa shaqyrdy.
Eske salaıyq, buǵan deıin Atyraýda topyraqty lastaǵan kompanııaǵa 4,3 mln teńge aıyppul salynǵanyn habarlaǵanbyz.
