Astanada Tóle bı kóshesiniń bir bóligi bir aıǵa jabylady
ASTANA. KAZINFORM — Astanada 5 maýsymnan 5 shildege deıin Tóle bı kóshesiniń Buhar Jyraý kóshesinen Uly Dala dańǵylyna deıingi aralyǵynda jol jamylǵysyn jóndeý júrgiziledi. Bul týraly Astana qalasynyń ákimdigi málim etti.
Osyǵan baılanysty atalǵan ýchaskede kólik qozǵalysy tolyqtaı jabylatyn bolady.
Júrgizýshiler men jaıaý júrginshiler júrý baǵytyn aldyn ala josparlaýy jáne yqtımal ózgeristerdi eskerýi qajet. Qaýipsizdikti qamtamasyz etý jáne qolaısyzdyqty azaıtý úshin ýaqytsha jol belgileri men kórsetkishter ornatylatyn bolady.
Eske sala keteıik, 4–5 maýsymy aralyǵynda Aqan Seri kóshesiniń N. Tilendıev dańǵylynan Qaramendi bı Shaqauly kóshesine deıingi ýchaskesinde jol tósemesiniń ústińgi qabatyn tóseý jumystarynyń júrgizilýine baılanysty atalǵan ýchaskede kólik qozǵalysy tolyqtaı jabylatyn bolady.
31 mamyr men 15 maýsym aralyǵynda N. Tilendıev dańǵylynyń Barshyn kóshesinen kólik jolaıryǵyna deıingi ýchaskesinde jóndeý jumysy júrgizilip jatyr.
