Astanada «Tóle bı, Qazybek bı, Áıteke bı portretteri» trıptıhynyń jáne «Qazaqtardyń Tsın ımperatoryna sáıgúlik syılaýy» atty kartınasynyń tusaýy kesiledi
ASTANA. Sáýirdiń 23-i. QazAqparat - Sáýirdiń aldaǵy 30-y kúni QR Prezıdenttik mádenıet ortalyǵynda Toqbolat Toǵysbaevtyń qazaqtyń kemeńgerleri «Tóle bı, Qazybek bı, Áıteke bı portretteri» trıptıhynyń jáne ıtalııandyq sýretshi Djýzeppe Kastılonıdiń «Qazaqtardyń Tsın ımperatoryna sáıgúlik syılaýy» atty kartınasy negizinde salynǵan Áseıin Jumabekovtyń týyndysynyń tusaýy kesiledi.
Táýelsizdik alǵaly beri Tóle bı, Qazybek jáne Áıteke bılerdiń kórkem beıneleri, ádebıetterde, dramatýrgııada, kınoda jáne ónerdiń basqa da salalarynda keńinen somdalyp keledi. Osy úsh bıdiń portretterin salǵan keskindemeshi, QazKSR eńbek sińirgen óner qaıratkeri T.Toǵysbaev bolatyn.
Trıptıhty jasaý barysynda T.Toǵysbaev, bıler men olardyń syrtqy kelbetterine qatysty muraǵat málimetterdi paıdalandy, bılerdiń tikeleı urpaqtarynan, sonymen qatar qazaq mádenıetiniń belgili tulǵalary M.Áýezovten, O.Súleımenovten, M.Erǵalıevten jáne taǵy basqa birqatar qaıratkerlerden, mamandardan keńes alyp otyrǵan. Osy tarıhı trıptıhtyń túpnusqasy sáýirdiń 23-i kúni QR Prezıdentiniń Mádenıet ortalyǵyna saltanatty túrde tapsyrylatyn bolady. Onyń kólemi - 69,5h49,5 metr.
Sondaı-aq Mádenı ortalyqtyń qoryna D. Kastılonıdiń «Qazaqtardyń Tsın ımperatoryna sáıgúlik syılaýy» («Hasake gýn ma tý») atty kartınasy negizinde salynǵan A. Jumabekovtyń sýreti tapsyrylady. Bul tarıhı týyndy 18 ǵasyrdaǵy qazaq-qytaı arasyndaǵy dıplomatııalyq qarym-qatynastardy kórsetedi.
Іs-sharany Prezıdenttik mádenıet ortalyǵy men M.H.Dýlatı qory uıymdastyrmaq.
