Astanada toqyma ónerkásibi salasyndaǵy Qazaqstan-Qytaı yntymaqtastyǵy talqylandy
Kezdesý «Kazakh Invest» UK-nyń qoldaýymen uıymdastyryldy. Jıyn barysynda Kazakh Invest basqarma tóraǵasy Saparbek Tuıaqbaev Qazaqstan men Qytaı arasyndaǵy birlesken ınvestıtsııalyq baǵdarlama aıasynda bıotehnologııalar, avtokólik klasteri, jańartylǵan energııa kózderi salalaryndaǵy iri joǵary tehnologııaly jobalardy iske asyrý bastalǵanyn atap ótti. Sondaı-aq, Elbasy N. Á. Nazarbaevtyń bıylǵy maýsym aıyndaǵy QHR-ǵa sapary barysynda basqa da kelisimderge qol jetkizildi.
«Toqyma ónerkásibi - yntymaqtastyqty arttyratyn úlken áleýeti bar, keleshekti baǵyt. Máselen, Qazaqstanda jyl saıyn 250 myń tonnaǵa jýyq maqta jınalady. Osy kólemniń shamamen úshten bir bóligi óńdeledi, al qalǵan bóligi shıkizat túrinde eksportqa baǵyttalady. Sonymen qatar, bizde Ózbekstanmen shekara mańynda ornalasqan "Ońtústik" arnaıy ekonomıkalyq aımaǵy bar. Halyqaralyq reıtıngterge sáıkes Qazaqstandaǵy ınvestıtsııalyq ahýaldyń Ortalyq Azııa aımaǵyndaǵy eń jaqsysy ekenin eskersek, QR-daǵy bıznesti dóńgeletip, eksportty odan ári damytýǵa ábden bolady», - dedi S. Tuıaqbaev.
Óz kezeginde «Ońtústik» AEA-nyń basshysy Medeý Dildábaev qytaılyq seriktesterge arnaıy ekonomıkalyq aımaq qatysýshylaryna qarastyrylǵan jeńildikter týraly egjeı-tegjeıli aıtyp berdi.
Toqyma ónerkásibi odaǵy - Qytaıdyń jetekshi uıymdarynyń biri. QHR Toqyma ónerkásibi mınıstrliginiń quramynan shyqqan Odaqtyń 20 jyldan astam tarıhy bar. Qazir uıymnyń qatarynda 20 mln-nan astam adam jumys isteıdi. Qytaıdyń búkil toqyma ónerkásibi jalpy eksportynyń 12%-y - osy odaq kompanııalaryna tıesili. Olardyń Qytaı ekonomıkasyna qosqan úlesi 3% dep baǵalanady.
Kezdesý barysynda toqyma ónerkásibi delegatsııasynyń músheleri maqta óndirý, shıkizatty qaıta óńdeý, kıim óndirisi jáne logıstıka salasyndaǵy yntymaqtastyq jóninde kelissózder júrgizdi.
«Bul bizdiń Qazaqstanǵa alǵashqy saparymyz jáne delegatsııa músheleriniń kópshiligi sizdiń elmen yntymaqtastyqty damytýǵa múddeli. Munda Kazakh Invest kompanııasynyń shaqyrýymen keldik. Menińshe, bul óte jemisti kezdesý boldy, biz Qazaqstannyń ınvestıtsııalyq áleýeti týraly bildik. Qazaqstan men Qytaı - ortaq taýlar men ózender arqyly baılanysqan, ortaq shekarasy bar el, sondyqtan osy sala boıynsha eki el arasynda úlken múmkindikter baryna senemin», - dedi Qytaı delegatsııasynyń basshysy, Qytaı Toqyma ónerkásibi odaǵynyń tóraǵasy Sýn Jýıchje.
Óz kezeginde Qazaqstan Respýblıkasyndaǵy Qytaı Halyqaralyq Saýda Palatasy ókildiginiń bas dırektorynyń orynbasary Gao Tsı:
«Búgingi kezdesý Qytaı men Qazaqstan arasyndaǵy toqyma ónerkásibi yntymaqtastyǵy úshin jaqsy bastama boldy. Úkimet ınvestorlar úshin óte qolaıly jaǵdaı jasap otyr. Sondyqtan búgingi kelissózder men talqylaýlardan keıin jaqsy nátıje bolady dep oılaımyn», - dep atap ótti.