Astanada Toqtar Tóleshovke qatysty jabyq sot bastaldy

ASTANA. QazAqparat - Astana qalasynyń mamandandyrylǵan aýdanaralyq áskerı sotynda burynǵy bıznesmen Toqtar Tóleshovke qatysty alǵashqy sot otyrysy bastaldy. Qylmystyq is jabyq túrde qaralyp jatyr. Buqaralyq aqparat quraldary sot dálizin kúzetýde.

Toqtar Tóleshov «Shymkentsyra» zaýytynyń burynǵy ıesi edi. 2016 jyldyń qańtarynda Shymkentte kúsh qurylymdary arnaıy operatsııa júrgizip, ony qolǵa túsirgen bolatyn. Arada alty aı ótken soń, ıaǵnı, maýsym aıynda ulttyq qaýipsizdik komıteti resmı málimdeme jasaı otyryp, Toqtar Tóleshovke qarajaty men laýazymyn paıdalana otyryp, bılikti kúshpen basyp alýǵa árekettendi degen aıyp taqty. Bul oıyn júzege asyrý úshin Toqtar Tóleshov quzyrly organdar men áskerı saladaǵy vedomstvolardan sybaılastar tapqan eken. Jalpy, osy qylmystyq iste 25 fıgýrant bar.

Qylmystyq istegi basty jaýapker Toqtar Tóleshev birqatar qylmystar boıynsha aıyptalyp otyr, olardyń arasynda: adam urlaý, óltirý, zańsyz bostandyǵynan aıyrý, bılikti basyp alýǵa jarııa shaqyrý, sondaı-aq bılikti basyp alý nemese QR konstıtýtsııalyq qurylysyn kúshtep ózgertý, ekstremıstik top qurý, oǵan basshylyq etý nemese onyń qyzmetine qatysý, tonaýshylyq, uıymdasqan qylmystyq top, uıym qurý jáne oǵan basshylyq etý sııaqty aıyptar taǵylǵan.

Sondaı-aq ol qarýlardyń, oq-dárilerdiń, jarylǵysh zattardyń jáne jarylǵysh qurylǵylardyń  zańsyz aınalymyna aıyptalýda.

Sonymen birge. Tóleshovtiń ótkizý maqsatynsyz esirtki zattarynyń zańsyz aınalymyna qatysy bar ekendigi jóninde aıyp taǵylýda.

Aıtyp ótkenimizdeı, sot jabyq túrde ótip jatyr. Óıtkeni, qylmystyq iste memlekettik qupııalarǵa qatysty derekter bar. Sot tóraǵasy - Erbol Ahmetjanov.