Astanada «Toqyraýyn tolqyndary» ansambliniń 50 jyldyǵyna arnalǵan kontsert ótti
ASTANA. KAZINFORM – Elordada búgin 50 jyldyq tarıhy bar «Toqyraýyn tolqyndary» án-bı ansambliniń mereıtoılyq keshi uıymdastyryldy. Óner ujymy 1975 jyldan beri qazaqtyń dástúrli mýzykasyn nasıhattap keledi.
– «Aqtoǵaı – altyn besigim» ánimen búkil elge tanyldyq desem, artyq aıtpaımyn. Aqtoǵaıdyń óneri men dástúri Áset Naımanbaev, Kúlásh Baıseıitova sııaqty tulǵalardan bastaý alady. Sol ónerdiń jalǵasy – bizdiń ansambl. 50 jyl ishinde ujym Vengrııa, Ýkraına, Úndistan, Frantsııa, Qytaı, Koreıa syndy elderde óner kórsetti, – deıdi ansambldiń burynǵy dırektory, Aqtoǵaıdyń óner ardageri Nurlan Kúlshikenov.
Al Qazaqstannyń eńbek sińirgen qaıratkeri, Q.Qýanyshbaev atyndaǵy ulttyq mýzykalyq drama teatrynyń bas horsmeısteri Amantaı Jumashev ansambldiń shyǵarmashylyq jolyna toqtalyp, esteligin bólisti.
– 50 jyl buryn bul ansambl ashylǵan kezde men balamyn. Eskendir Hasanǵalıev pen Bákir Tájibaev kelip daıyndaǵan sátter áli esimde. Men sol áýenmen óstim, sol arqyly ónerge keldim. Qazir sol dástúrdi jańasha formatta jalǵastyryp, 80 jastaǵy qarııadan 8 jasar balaǵa deıin tyńdaıtyndaı áýen jasaýǵa tyrysyp júrmiz. Mereıtoıǵa arnap birneshe jańa án engizdik – «Tolqıdy Toqyraýyn», «Án meken Aqtoǵaı», «Qyzylaraı» jáne «50 jyldyq» atty týyndylar, – deıdi ol.
Kontserttiń kórkemdik sheshimin ázirlegen Aqtoǵaı halyq teatrynyń rejısseri Qulmuhammet Serikǵalyulynyń aıtýynsha, mereıtoılyq baǵdarlama sımvolıkalyq mánge ıe.
– «Toqyraýyn tolqyndary» ataýy beker qoıylǵan joq. Bul Toqyraýyn ózeniniń tolqynyndaı toqtaýsyz ónerdi, arnasynan tasymaıtyn, biraq eshqashan tartylmaıtyn mádenıetti bildiredi. Kontserttiń prologynda tabıǵat pen ónerdiń, ótken men búginniń úndestigi kórinis tabady. Bul – dástúr men jańashyldyqtyń toǵysy, – deıdi rejısser.
Mereıtoılyq keshte ansambldiń ár jyldardaǵy repertýarynan úzdik shyǵarmalar oryndalyp, sahna tórine elge tanymal óner sheberleri men ansambldiń burynǵy músheleri shyǵady.
1975 jyly Qaraǵandy oblysynyń Toqyraýyn óńirinde qurylǵan ujym qazaqtyń dástúrli mýzyka óneriniń damýyna aıryqsha úles qosyp kele jatqan óner ordasy sanalady. Ansambldiń baı repertýarynda halyq ánderi, kúıler, termeler men zamanaýı etno-folklorlyq týyndylar bar. Ujym jarty ǵasyr ishinde Qazaqstannyń jáne shetel sahnalarynyń tórinde ulttyq ónerdiń abyroıyn asqaqtatyp, eldiń mádenı brendine aınaldy.
Aıta keteıik, Astanada aýtızm taqyrybyndaǵy alǵashqy spektakldiń tusaýkeseri ótti.