Astanada toǵyzqumalaqtan jasóspirimderdiń «Jas úmit» respýblıkalyq jarysy ótedi
ASTANA. 31 mamyr. QazAqparat - 1-5 maýsym aralyǵynda Astana qalasynda Toǵyzqumalaqtan Tuńǵysh ret Astana qalasynyń kýbogine arnalǵan «Jas úmit» jasóspirimderdiń respýblıkalyq jarysy ótkiziledi.
Bul jarysty Astana qalasynyń týrızm, dene tárbıesi jáne sport basqarmasy Astana qalasynyń ákimdiginiń qoldaýymen, Toǵyzqumalaq Zııatkerlik Qaýymdastyǵymen birlese ótkizedi. Maqsaty - qazaq halqynyń zııatkerlik oıyny toǵyzqumalaqtyń buqaralyq sıpatyn arttyrý, eń úzdik jasóspirim sportshylardy anyqtaý, zııatkerlik bastamalardy dáripteý, dep habarlady jarysty uıymdastyrýshylar alqasy.
Toǵyzqumalaq sońǵy jyldary joǵarǵy qarqynmen damyp keledi. Toǵyzqumalaq qaýymdastyǵynyń, Qazaqstan Respýblıkasy týrızm jáne sport agenttiginiń, Astana qalasy jáne oblys ákimshilikteriniń qoldaýy arqasynda bul oıynmen shuǵyldanýshylardyń sany 100 myń adamǵa jaqyndady.
Qazir toǵyzqumalaqpen álemniń 20-dan astam elderinde shuǵyldanyp, Germanııa, Chehııa, Shveıtsarııa, Frantsııa, Reseı, Ózbekstan jáne Túrkııa memleketterinde dástúrli jarystar ótkizilip, jergilikti halyqtardyń arasynda oınaýshylardyń sany artýda. 2008 jyly Halyqaralyq Toǵyzqumalaq Qaýymdastyǵy qurylyp, sonyń arqasynda álemdik básekeler ótkizý qolǵa alyndy. 2009 jyly Shymkent qalasynda І Azııa chempıonaty ótkizilse, 2010 jyly Astana qalasynda І Álem chempıonaty uıymdastyryldy. 2011 jyly Eýropa chempıonaty tuńǵysh ret Chehııanyń Pardýbıtse qalasynda boldy. 2012 jyly ІІ Álem chempıonaty Chehııanyń Pardýbıtse qalasynda ótkizildi.
Toǵyzqumalaqtyń respýblıka óńirlerinde jáne halyqaralyq deńgeıde damýyna Astana qalasynyń ákimdigi men Astana qalasynyń týrızm, dene tárbıesi jáne sport basqarmasy erekshe úles qosyp otyr. Kóptegen mańyzdy is-sharalardyń elordamyzda ótýi osyǵan aıǵaq. Toǵyzqumalaqtan Dúnıejúzilik Qazaqtar quryltaıyna arnalǵan halyqaralyq jarys (2006 j.), tuńǵysh Álem chempıonaty (2010 j.), Qazaqstan Respýblıkasy Prezıdentiniń júldesine arnalǵan halyqaralyq jarystar (2005, 2011 j-j.), Qazaqstan Respýblıkasynyń halyq oıyndary (2011 j.) jáne taǵy basqada sharalar ótkizildi. Bul jarystardyń barlyǵy toǵyzqumalaqtyń joǵary satyǵa kóterilýinde mańyzdy oryn ıelendi.
Jarys týraly tolyq aqparat alý úshin www.9kumalak.com saıtyn qaraýǵa bolady.
