Astanada toǵyzqumalaqtan tuńǵysh Álem chempıonaty ótedi
ASTANA. Qazannyń 28-i. QazAqparat - 2010 jylǵy qarashanyń 2-7-si aralyǵynda Astanada toǵyzqumalaqtan tuńǵysh Álem chempıonaty ótkiziledi. Bul jarysty Qazaqstan Respýblıkasynyń Týrızm jáne sport mınıstrliginiń Sport komıteti, Halyqaralyq jáne Qazaqstan Toǵyzqumalaq qaýymdastyqtary men Astana qalasynyń ákimdigi uıymdastyrady.
«Maqsaty - qazaq halqynyń zııatkerlik oıyny toǵyzqumalaqty álemdik deńgeıde nasıhattaý, eń úzdik sportshylardy anyqtaý, oıynnyń halyqaralyq tanymaldyǵy men buqaralyǵyn arttyrý»,-delingen QR Toǵyzqumalaq federatsııasynyń resmı saıtynda.
Alǵashqy álem chempıonatyna Ázirbaıjan, Germanııa, Mysyr, Ispanııa, Qazaqstan, Qyrǵyzstan, Qytaı, Ózbekstan, Grýzııa, Mońǵolııa, Túrkııa, Túrikmenstan, Reseı, Ýkraına, Chehııa, Shveıtsarııadan 50-ge jýyq sportshy qatysady. Chempıonat erler jáne áıelder arasynda ótedi.
Qazaqstan atynan Ǵ.Temirbaev pen A.Seıtjanov, D.Kenına, Á.Dalıeva, S.Saparbekova syndy halyqaralyq dárejedegi sport sheberleri óner kórsetedi.
Uıymdastrýshylardyń málimetine qaraǵanda, toǵyzqumalaq sporty sońǵy jyldary joǵarǵy qarqynmen damyp keledi. Toǵyzqumalaq qaýymdastyǵy, Qazaqstan Respýblıkasy Týrızm jáne sport mınıstrligi, oblys ákimshilikteriniń qoldaýy arqasynda bul oıynmen shuǵyldanýshylardyń sany 100 myń adamǵa jaqyndady. Oıynǵa halyqaralyq deńgeıde de qyzyǵýshylyq ósip keledi. Qazir toǵyzqumalaqpen tek sheteldegi qazaqtar ǵana emes, Ulybrıtanııa, Frantsııa, Germanııa, Ispanııa, Chehııa, Reseı, Mońǵolııa, Qytaı memleketterinde jergilikti turǵyndar da aınalysady.
Toǵyzqumalaq alty ret 2006 jyly - Londonda, 2007, 2008, 2009 jáne 2010 jyldary - Praga men Pardýbıtsede (Chehııa), 2010 j. - Kannda (Frantsııa) dúnıejúzilik zııatkerlik olımpıada men festıvalderdiń baǵdarlamasyna endi. 2007 jyly Makedonııada ótken Túrki tildes jastar quryltaıynda 40 elden kelgen 240 delegatqa ulttyq oıynnan semınar ótkizildi.
Sheteldegi toǵyzqumalaq janashyrlary úshin Anglııada (2009 j.), Shveıtsarııada (2008 j.), Kolýmbııada (2008 j.), Qytaıda (2008 j.), Túrkııada (2007, 2008, 2009, 2010 jj.), Ózbekstanda (2009, 2010 jj.), Qyrǵyzstanda (2010 j.), Reseıde (2007, 2008, 2010 jj.) ádistemelik sharalar jáne jarystar uıymdastyryldy.
Jarystyń ashylý saltanaty qarashanyń 2-sinde «Pekın Palas » qonaq úıinde ótedi.
