Astanada toǵyzqumalaqtan ótken týrnırge myqty 10 oıynshy qatysty
NUR-SULTAN. QazAqparat - Nur-Sultan qalasynda tuńǵysh ret toǵyzqumalaqtan ótken «The ONE Hotel Open» respýblıkalyq týrnıriniń jeńimpazdary men júldegerleri anyqtaldy, dep habarlaıdy QazAqparat tilshisi.
QR Toǵyzqumalaq sporty federatsııasy málim etkendeı, atalǵan saıys keshe, ıaǵnı 21 mamyr kúni elordada «The ONE Hotel» qonaq úıiniń demeýshiligimen ótti.
Jarysqa elimizdiń eń úzdik degen 10 oıynshy qatysty. Olardyń qatarynda álem, Azııa birinshilikteriniń, sondaı aq QR chempıonatynda eshkimge des bermeı júrgen oıynshylar boldy.
Jarystyń ashylýy saltanatyna Dúnıejúzilik jəne toǵyzqumalaq federatsııasynyń prezıdenti - Álıhan Baımenov qatysyp, oıynshylarǵa sáttilik tiledi.
Asa tartysty ótken týrnır barysynda bas júldeni Ǵalymjan Temirbaev (Shymkent) alsa, ekinshi oryn Janat Qaımoldınge (Pavlodar) buıyrdy. Al úzdik úshinshi oryndy Bıǵalı Zikrııaev (Nur-Sultan) jeńip aldy.
Atalǵan dodada jeńimpaz ben júldegerler atanǵan oıynshylar «The ONE Hotel» taǵaıyndaǵan dıplomdary men aqshalaı syıaqymen marapattaldy.
Eske sala ketsek, jarysty jyl saıyn uıymdastyrý jónindegi oıdy taıaýda Túrkııada toǵyzqumalaqtan ótken álem chempıonaty aıasyndaǵy jınalysta «Dúnıejúzilik Toǵyzqumalaq federatsııasynyń» vıtse-prezıdenti qyzmetine saılanǵan, toǵyzqumalaq janashyry Maqsat Ramanqulov ortaǵa salǵan bolatyn. 
