Astanada toǵyz bilim ordasy zamanaýı keıipke endi
ASTANA. KAZINFORM — Astanada mektepterdi jańǵyrtý jumystary jalǵasyp jatyr. Bıyl elordada josparlanǵan 22 mekteptiń toǵyzyna kúrdeli jóndeý aıaqtaldy. Jańartylǵan bilim berý uıymdarynyń biri — Kóktal turǵyn alabyndaǵy №41 mektep, munda jańa úsh qabatty oqý korpýsy da paıdalanýǵa berildi. Bul týraly elorda ákimdigi habarlady.
Kóktal turǵyn alabynda ornalasqan № 41 jalpy bilim beretin mektep. Mekteptiń negizgi ǵımaraty bıylǵy jazda tolyq kúrdeli jóndeýden ótip, zamanaýı talaptarǵa saı jańartyldy.
Jobalyq qýaty 460 orynǵa eseptelgen mektepte ár jyldary 1 300-den 1 500-ge deıin bala bilim alǵan. Oqýshy oryndarynyń tapshylyǵyn azaıtý maqsatynda bıyl mektep aýmaǵynda jańa qosymsha oqý korpýsy paıdalanýǵa berildi.
1 qyrkúıekte aýdany 7 148 sharshy metr bolatyn jańa úsh qabatty korpýs ashyldy. Sonyń nátıjesinde mekteptiń oqý keńistigi keńeıip, oqýshylardy ornalastyrý múmkindigi artty. Qazirgi ýaqytta mektepte 1 300-ge jýyq oqýshy bilim alady.
Jańartylǵan mektepte bastaýysh jáne joǵary synyp oqýshylaryna arnalǵan bilim berý keńistigi bólek uıymdastyrylǵan. Eski ǵımaratta 1–4 synyp oqýshylary bilim alady. Olar úshin jeke ashana, oqý keńistikteri jáne jańa korpýsqa ótetin arnaıy ótkel qarastyrylǵan.
— Bıyl jazda eski ǵımaratta kúrdeli jóndeý jumystary júrgizildi. Barlyq kabınetter talapqa saı jabdyqtalyp, jańa jıhaz satyp alyndy. Bul ǵımaratta bastaýysh synyptar ornalastyrylǵan. 1–4 synyp oqýshylary bólek bilim alady, olar úshin jeke ashana jáne jańa korpýsqa ótetin ótkel qarastyrylǵan, — dedi mektep dırektory.
5–11 synyp oqýshylary jańa ǵımaratta bilim alady. Munda 23 oqý kabıneti jabdyqtalǵan. Onyń ishinde eki ınformatıka kabıneti, robototehnıka kabıneti jáne STEM-zerthana bar.
Jańa oqý kabınetteri zamanaýı jabdyqtarmen qamtamasyz etilgen. Praktıkalyq sabaqtarǵa arnalǵan kabınetterde tokar jáne lazerlik stanoktar, 3D-prınterler, robottar men kvadrokopterler ornatylǵan. Sondaı-aq tigin jáne aspazdyq kabınetteri tolyq jabdyqtalǵan.
Budan bólek, fızıka, hımııa jáne bıologııa pánderine arnalǵan mamandandyrylǵan kabınetter jańartylyp, mektepte tolyqqandy medıtsınalyq blok quryldy. Zamanaýı sport zaly men ashana da jańa korpýsta ornalasqan.
Mektepte bilim berý protsesine tsıfrlyq tehnologııalardy engizýge erekshe kóńil bólinedi. Oqýshylardyń tarıhqa degen tanymdyq qyzyǵýshylyǵyn arttyrý maqsatynda Ulttyq mýzeımen birlesip «Bozoq» jobasy júzege asyrylýda. Joba aıasynda 3D-kózildirikterdi paıdalana otyryp, vırtýaldy tarıhı ekskýrsııalar ótkizý josparlanǵan.
Osylaısha, jarty ǵasyrdan astam tarıhy bar № 41 mektepte ǵımarattar ǵana emes, bilim berý ortasy da jańardy. Kúrdeli jóndeý, jańa korpýs, zamanaýı kabınetter men tsıfrlyq tehnologııalar oqýshylardyń bilim alýyna barynsha qaýipsiz ári jaıly jaǵdaı jasaýǵa múmkindik berdi.
Buǵan deıin Astana mektepterinde ata-analarǵa arnalǵan kitap oqý buryshtary ashylǵanyn jazdyq.
