Astanada tóbeles kezinde adam qaza bolǵan is boıynsha eki adam sottaldy
ASTANA. KAZINFORM — Astana qalasynyń qylmystyq ister jónindegi aýdanaralyq soty tóbeles kezinde adam ólimine ákep soqqan is boıynsha eki adamǵa úkim shyǵardy.
Sot málimetinshe, oqıǵa 2025 jylǵy jeltoqsanda Astanadaǵy oıyn-saýyq oryndarynyń birinde bolǵan. Á. jáne A. alkogoldik masań kúıde jábirlenýshiler G. jáne Ch.-men sózge kelip qalǵan.
Janjal barysynda olar eki jábirlenýshiniń denesiniń ártúrli bólikterine birneshe ret soqqy jasaǵan. Keıin oqıǵa ornynan ketip qalǵan. Al Ch. alǵan dene jaraqattarynan oqıǵa ornynda kóz jumǵan.
Sotta sottalǵandardyń kinási kýálardyń aıǵaqtarymen, saraptamalardyń qorytyndylarymen, beınejazbalarmen jáne qylmystyq is boıynsha basqa da dáleldermen rastaldy.
Sot A.-nyń buryn sottalmaǵanyn jáne kámeletke tolmaǵan balasynyń baryn jeńildetetin mán-jaı dep tanydy. Á.-ǵa qatysty onyń buryn sottalmaǵany eskerildi. Al qylmysty alkogoldik masań kúıde jasaý eki sottalýshyǵa da qatysty aýyrlatatyn mán-jaı retinde tanyldy.
— Sot A.-ny QR QK 106-babynyń 3-bóligi boıynsha 8 jyl 6 aıǵa, al Á.-ny 9 jylǵa bas bostandyǵynan aıyrdy. Sonymen qatar sottalǵandardan materıaldyq zalal retinde 1 mln 905 myń teńge, ókildik etý shyǵyndary úshin 2 mln teńge jáne moraldyq zııan retinde 10 mln teńge óndirildi. Úkim ázirge zańdy kúshine engen joq, — delingen habarlamada.
Buǵan deıin Túrkistan oblysynda jańa týǵan sábıin ájethanaǵa tastap óltirgen áıel sottalǵanyn jazǵanbyz.
