Astanada TMD boıynsha alǵashqy «Seedstars» startap-ınkýbatory ashylady
ASTANA. QazAqparat - 1 jeltoqsanda elordada halyqaralyq tehnologııalyq startap-ınkýbatory ashylady. Ortalyq EKSPO mańyndaǵy «Hilton Astana» otelinde ornalasqan, dep habarlaıdy elorda ákimdiginiń resmı saıty.
Ult kóshbasshysynyń «Rýhanı jańǵyrý» baǵdarlamalyq maqalasy men «Astana - ınnovatsııalar qalasy» strategııasy qaǵıdalaryn iske asyrýda «Hilton Astana» oteliniń alańynda Astana qalasy ınvestıtsııa jáne kásipkerlikti qoldaý basqarmasy MB men halyqaralyq bıznes ınkýbatorlary «Seedstars» jáne «BI Property» JShS arasynda áriptestik týraly memorandýmǵa qol qoıyldy.
Kelisim sheńberinde qatysýshy kompanııalar salǵan ınvestıtsııanyń arqasynda Astana qalasynda adam kapıtalyn damytý úshin biregeı alań qurylady, onda qalanyń árbir turǵyny tájirıbe alyp, jańa tehnologııa salasynda jeke jobasyn iske asyra alady jáne jastardyń áleýetin damytýǵa basymdyq beriledi.
«Úlken qalalardyń tájirıbesi kórsetkendeı, jahandyq qalalardyń tepe teń damýy kreatıvi joq ındýstrııasyz múmkin emes - ol tsıfrly tehnologııa, sáýlet jáne dızaın, zamanaýı medıa, óner men mádenıet. Sol sebepti, biz kreatıvti klasterdiń negizin qalyptastyratyn Qalalyq ınnovatsııalyq alań qurmaqpyz. Munda astananyń ınnovatsııalyq ekojúıesi qalyptasady», - dedi Astana qalasynyń ákimi Áset Isekeshev.
Qalalyq ınnovatsııalyq alań qurý startap-jobalardy damytý úshin keń múmkindikti ashady jáne halyqaralyq deńgeıde tájirıbe almasýǵa, sondaı-aq jańa kásipkerler býyny men tsıfrly nomadtardy qalyptastyrýǵa múmkindik beredi. Ol úshin alań rezıdentinde mentorlardyń aýqymdy jelisi, konsýltanttar, tehnıkalyq mamandar, bıznes-perishteler men ınvestıtsııalyq jobalarǵa barynsha qoljetimdilik usynylady.
Atalmysh alańnyń ereksheligi mynada, árbir qazaqstandyq ázirleýshiniń aldynda ІT-tehnologııasy salasyndaǵy álemdik tendentsııaǵa qoljetimdi múmkindik ashylady. Bul «Seedstars» basqaratyn TMD kólemindegi birden bir kovorkıng-ortalyq bolmaq.
Halyqaralyq bıznes-ınkýbatordyń seriktesteriniń biri Devıd Dekombes óz sózinde ortalyqta álem boıynsha 70 myńnan astam startaper, kásipker men ınvestorlar bar ekendigin atap ótti. Sondaı-aq jobaǵa qosylǵannan keıin Astana da biryńǵaı jeliniń bólshegine aınalyp, tájirıbe almasýǵa jáne tehnologııanyń damýy úshin ózine úlken múmkindikter ashatynyn aıtty.
Alańda 14 kovorkıng-keńse bolady jáne de kolıvıng aýmaǵynan tehnıkalyq sheshimderdi ázirleý úshin jáne mobıldi qosymshalardy iske qosýǵa yńǵaıly 14 oryn qarastyrylǵan.
«Qatysýshylarǵa qoıylatyn basty krıterıı - ınnovatsııalyq, tehnologııalyq ónim jasaý. Jobany iske asyrý eń birinshi elordada, ári qaraı búkil Qazaqstanǵa baǵyttalady. Odan basqa, ortalyqtyń jumysy qala ekonomıkasyna oń yqpalyn tıgizip, bolashaqta halyqaralyq arenaǵa shyǵýy múmkin», - dep túsindirdi Innovatsııalyq ekojúıeni damytý ortalyǵynyń bas menedjeri Jasulan Kenjeǵalıev.
Qazirgi tańda «BI Property» kompanııasy «Hilton Astana» oteliniń aýmaǵynda jobany iske tolyqtaı qosý úshin keńse daıyndaýda. Jóndeý jumystary osy jyldyń 1 jeltoqsanyna deıin aıaqtalady.
