Astanada tirkelmegen taksıler «Bus Lane» jolaǵyna shyqsa jaýapqa tartylady
ASTANA. QazAqparat - Kólik qyzmetkerleri qaýymdastyǵynyń tóraǵasy Medet Qurmanov jolaýshylardyń jeke tasymalymen aınalysatyn júrgizýshilerdi «Bus Lane» jolaqtaryna shyqqandyǵy úshin jaýapqa tartylatynyn eskertti, dep habarlaıdy QazAqparat elorda ákimdiginiń medıa ortalyǵyna silteme jasap.
«Biz qazir resmı tirkelmegen taksı júrgizýshileriniń «Bus Lane» arnaıy jol jolaqtaryna jıi shyǵyp ketetinin baıqap otyrmyz. Olar jazasyz qalamyz dep esepteıtin bolar, biraq qyrkúıek aıynda foto jáne beıne tirkeıtin «Sergek» júıesi iske qosylǵandyǵyn eske salǵym keledi. Bul júıeniń kómegimen JJE-in buzýdyń faktileri, onyń ishinde jeke tasymalmen aınalysatyn taksı júrgizýshileriniń «Bus Lane» jolaqtaryna shyǵýy da tirkelip otyrady», - dep habarlady Medet Qurmanov.
Elordanyń kólik qyzmetkerleri assotsııatsııasynyń tóraǵasynyń sózinshe, qazirgi tańda qoǵamdyq kólikterden basqa «Bus Lane» jolaǵymen Astananyń jolaýshylar kóligi basqarmasynda resmı túrde tirkelgen tasymaldaýshylardyń kólikteri júredi. Al, «Bus Lane» jolaǵyna shyǵyp jeke tasymaldaýmen aınalysqandar ákimshilik jaýapkershilikke tartylady.
Munymen qosa, resmı túrde tirkelgen tasymaldaýshylardyń sanyn arttyrýǵa baǵyttalǵan sharalar qolǵa alynýda. Endi «Astana taxi» brendimen tek taksı qyzmetin kórsetýshi kompanııalar ǵana emes jeke taksı júrgizýshileri de jumys isteı alady.
«Qazirgi tańda biryńǵaı taksı qyzmeti júıesine tirkelý qıyn emes. Ol úshin Taksomotorly kompanııalar qaýymdastyǵyna habarlasý qajet. Kompanııanyń kólikke qoıatyn talaptary bar. Kóligińizdiń eskiligi 7 jyldan aspaýy kerek. Onyń túsi aq bolǵany jón. Júrgizýshigede talaptar qoıylady olar tárbıeli, jaýapty, adamgershiligi mol azamat bolǵany abzal», - dep aıtty Medet Qurmanov.
Qyzmetke resmı túrde tirkelgen júrgizýshiler «Astana taxi»-diń call-ortalyqtary arqyly tapsyrystardy qabyldaý, «Bus Lane» jolaǵymen júrý múmkindikterinen basqa resmı taksı qyzmetteri elorda áýejaıynyń, eki temirjol vokzalynyń aýmaǵyndaǵy mamandandyrylǵan avtoturaqtarǵa, astanalyq taksıge arnalǵan ınfraqurylymdardyń sheńberinde qurylyp jatqan basqa da qalalyq turaqtardy paıdalaný quqyǵyna ıe bolady.
«Jeke tasymalmen aınalysyp júrgen júrgizýshiler «Astana taxi» qyzmetine tirkelip, sonyń arqasynda bıýdjetke salyq túsimderi ósti. Jáne qyzmet baǵasyna biryńǵaı tarıf engizip, ortalyqtandyrylǵan call-ortalyǵy qurylyp, qyzmet kórsetý sapasyn jaqsartý baǵytyndaǵy jumystar jalǵasa bermek», deıdi Medet Qurmanov.
Foto: ALRT
