Astanada tirkelgen jol-kólik oqıǵalarynda 60 bala japa shekti - ІІD
ASTANA. QazAqparat - Jyl basynan beri Astanada tirkelgen jol-kólik oqıǵalarynda 60 kámeletke tolmaǵan bala japa shekti. Onyń bireýi qaıtys bolyp, 59-y jaraqattandy. Bul týraly búgin Astana qalalyq ІІD Ákimshilik polıtsııa basqarmasynda ótken baspasóz brıfıngte habarlandy.
Ákimshilik polıtsııa basshylyǵynyń habarlaýynsha, bul ótken jylǵy osy merzimdegi kórsetkishpen salystyrǵanda 25 paıyzǵa azaıǵan. Mamandardyń aıtýynsha, jol kólik oqıǵalaryna kóbine balalardyń jolda alańǵasarlanyp, uıaly telefondaryna áýrelenýi, qulaqqaptaryndaǵy áýen dybysyn qatty qoıǵandyqtan, kólik sıgnalyn estimeı qalýy basty sebep bolyp jatady. Sonymen qatar, búgingi brıfıngte Astanada eki aptaǵa jalǵasatyn «Abaılańyz, balalar» atty jedel-profılaktıkalyq is-sharasy bastalǵanyn habarlandy. Atalǵan shara jyl saıyn oqý jylynyń aldynda ótkiziledi. Mundaǵy maqsat - balalardy jol-kólik oqıǵalarynan saqtandyrý jáne ondaı oqıǵalardyń aldyn alý. Sonymen qatar, shara aıasynda uıymdastyrýshylar jol-kólik oqıǵasynan zardap shekken balalarmen kezdesip, psıhologııalyq kómek kórsetedi. Aıta keteıik, jedel-profılaktıkalyq shara barysynda tártip saqshylary jalpy bilim beretin mekemeler men jasóspirimder jıi jınalatyn alańdardy kúzetedi. Sondaı-aq, 1 qyrkúıekte qala mektepterin aralap, oqýshylarǵa mektep formasy men sómkeler syılaıdy.
