Astanada «Tilep qobyz saraıy» ashylady
ASTANA. 29 maýsym. QazAqparat - Elordada búgin resmı túrde ashylǵaly otyrǵan «Tilep qobyz saraıynyń» kórermen zaly qazaqy kıiz úı túrinde jasalǵan, al zaldyń ishi qazaqtyń ulttyq naqyshtarymen bezendirilgen.
Akýstıkasy japonııalyq mamandardyń kómegimen iske asyryldy. Bul týraly Astanadaǵy baspasóz konferentsııasynda jobanyń quryltaıshysy men metsenat Sapar Ysqaqov málimdedi.
1tv.kz saıty habarlaǵandaı, qalalyq mádenıet basqarmasy mamandarynyń aıtýynsha, jańa kontserttik zaldyń jobasy elorda úshin úlken mádenı jáne áleýmettik mańyzǵa ıe. Zal 340 orynǵa eseptelgen, onyń bıiktigi - 5 qabattyq ǵımarattaı. Bul Astananyń túrli mádenı is-sharalary ótetin biregeı nysan bolmaq.
«Tilep qobyz saraıy» degen ataý kezdeısoq tańdalǵan joq. Tańǵajaıyp ǵımarattyń quryltaıshysy men tapsyrys berýshisi Sapar Ysqaqov ony óziniń arǵy atasy, ataqty sazger ári qobyzshy bolǵan Tilep Aspantaıulyna (1757-1820) arnaıdy. Ańyzǵa saı, Qorqyttyń qobyzynyń sarynyn mıras etken onyń shákirti, baqsy Qoılybaı bolsa, al ol osy ónerdi 13 jasar Tilep Aspantaıulyna tabystap, batasyn bergen eken.
Ǵımarat týrıster jol tartatyn taǵy bir orynǵa aınalady dep kútilýde. Onda 125 orynǵa eseptelgen 79 qonaqúı nómiri, 170 orynǵa arnalǵan meıramhana, 80 oryndyq kafe-bar, fıtnes-ortalyq, 300 sharshy metrdi qamtıtyn keńse-saýda oryndary jáne týrızmdi, saýda nysandaryn, bıznes-ortalyqtardy uıymdastyrýǵa arnalǵan túrli maqsattaǵy basqa da jaılar bar.
