Astanada tilderdi damytýǵa qosymsha 310 mln teńge kerek - basqarma

NUR-SULTAN. QazAqparat – Nur-Sultan qalasy tilderdi damytý jáne arhıv isi basqarmasynyń basshysy Sáken Esirkep bıýdjetti naqtylaý kezinde qosymsha 310 mln teńge surady, dep habarlaıdy QazAqparat tilshisi.

«2022 jyldyń ekinshi toqsanynda bıýdjetti naqtylaýǵa Tilderdi damytý basqarmasynan usynylǵan ótinimderge baılanysty qarajattyń jalpy somasy – 310 mln 859 myń teńge. Onyń ishinde til saıasatyn júzege asyrýǵa arnalǵan sharalarǵa - 110 mln 10 myń teńge, al arhıv isin damytýǵa arnalǵany - 200 mln 849 myń teńge», - degen basqarma basshysy bul aqshanyń qandaı sharalarǵa jumsalatynyn tizip berdi.

«Memlekettik tildi jáne Qazaqstan halqynyń basqa da tilderin damytýǵa 90 mln 10 myń teńge suralyp otyr. Onyń ishinde zııaly qaýym ókilderimen ár túrli baǵytta tanymdyq sharalar ótkizý, oqý oryndarynda kezdesýler serııasyn ótkizý baǵyty boıynsha 15 mln teńge surap otyrmyz. Halyqaralyq qazaq tili qoǵamynyń áleýetin tarta otyryp, «Kórneki aqparat» degen arnaıy jobany júzege asyrýǵa 8 mln teńge qajet», -deıdi ol.

Basqarma basshysynyń aıtýynsha, bul – QR Memleket hatshysynyń tikeleı tapsyrmasy boıynsha qolǵa alynǵan joba.

«Qalanyń iri saýda oryndarynda, parkterde, bazarlar men qoǵamdyq oryndarynda aýdıorotatsııa ornatýǵa suralatyn qarjy kólemi – 9 mln teńge. Abaıdyń qara sózderinen bastap maqal-mátelder, naqyl sózder, poezııa úzindileri jyl sońyna deıin atalǵan oryndarda oınap turady», – dedi Sáken Esirkep.

Buǵan deıin jazǵanymyzdaı, QR Ulttyq ekonomıka vıtse-mınıstri Azamat Ámrın jańa bastamalar boıynsha lımıtter bıýdjet shyǵystarynyń ósý qarqyny negizinde aıqyndalatynyn aıtqan bolatyn.