Astanada «Terrıtorııa komforta-1» turǵyn úıin salý ýaqytsha toqtatyldy
ASTANA. QazAqparat - Elordadaǵy «Terrıtorııa komforta - 1»turǵyn úı kesheniniń qurylysyndaǵy jumystary ýaqytsha toqtatyldy, dep habarlaıdy qala ákimdigi .
Astana qalasynyń ákimdigi «Terrıtorııa komforta - 1» turǵyn úı kesheniniń qurylysyna qarjy salǵan azamattardyń ótinishterimen jumys sheńberinde kelesi jaıttardyń málim etti.
«Túrkistan kóshesiniń boıyndaǵy jalpy aýdany 1,5097 ga jer teliminde, Almaty kóshesiniń soltústik bóliginde ornalasqan «Terrıtorııa komforta - 1» turǵyn úı kesheniniń qurylysyn aıaqtaý maqsatynda «TK1-Astana» turǵyn úı-qurylys kooperatıvi quryldy.
TQK óz betimen «KazInvestKonstrakshnGrýpp» JShS-yn (budan ary JShS) tartqan.
TQK jáne JShS arasynda qol qoıylǵan 2014 jyldyń 22 qyrkúıegindegi birlesken qyzmet týraly kelisimsharttyń negizinde Astana qalasy ákimdiginiń qaýlysymen olarǵa zertteý jumystaryn júrgizýge jáne kiristirilgen qurylystary jáne parkıngi bar kóp páterli turǵyn úı keshenin jobalaýǵa ruqsat berildi.
Astana qalasynyń ákimdigi TK qurylysyn aıaqtaý úshin ruqsat qujattaryn rásimdeýde barynsha qoldaý kórsetip otyr. Júrgizilip jatqan jumystardyń nátıjesinde qurylys ýchaskesiniń shekaralarynda qyzyl syzyqtar ózgertildi.
Qurylys júrgizýshi jumys jobasyn ázirlep jatyr, ol memlekettik saraptamaǵa jiberiletin bolady.
QR Sáýlet jáne qala qurylysy salasyndaǵy zańnamasyna sáıkes, nysandardyń qurylysy memlekettik saraptamadan ótken jobanyń jáne ákimdiktiń qurylys júrgizýge bergen ruqsatynyń negizinde iske asyrylady.
Alaıda «KazInvestKonstrakshnGrýpp» JShS joǵaryda atalǵan qujattarsyz, ıaǵnı, saraptamadan ótken jobasyz jáne qurylysqa beriletin ruqsatsyz qurylys-montaj jumystaryn bastap qoıǵan.
Joǵaryda baıandalǵandy eskere otyryp jáne zań talaptarynyń buzylýyna jol bermeý maqsatynda Astana qalasynyń Memlekettik sáýlet-qurylys baqylaý basqarmasy ruqsat berý qujattary alynǵan ýaqytqa deıin «Terrıtorııa komforta - 1» TK-inde qurylys-montaj jumystaryn toqtatý týraly sharalar qabyldady», - delingen málimdemede.
Ákimdik nysandardy jobalyq qujattarsyz salý ony keıin paıdalaný kezinde adamnyń ómiri men densaýlyǵyna qaýip tóndiretinin atap kórsetken.
