Astanada teraktiniń joly kesildi - Á. Jaqsybekov
ASTANA. QazAqparat - Qazaqstannyń Ulttyq qaýipsizdik komıteti elordada josparlanǵan teraktiniń aldyn aldy. Bul týraly búgin Zańdylyqty, quqyqtyq tártipti jáne qylmysqa qarsy kúresti qamtamasyz etý boıynsha Astana qalasy Úılestirý keńesiniń kezekti otyrysynda elorda ákimi Ádilbek Jaqsybekov málim etti.
«Lańkestikke qarsy máseleler birinshi orynǵa shyǵýda. 4 aı buryn qalada Ulttyq qaýipsizdik komıteti Astanada teraktini josparlaǵan jasyrynǵan jáne jabdyqtalǵan úlken topty áshkere etti»,-dedi Á. Jaqsybekov.
Otyrys barysynda ákim lańkestik qaterlerdiń aldyn alý men jolyn kesý boıynsha jumystardy kúsheıtý kerektigin qadap aıtty.
«Keshe qalalyq lańkestikke qarsy komıssııanyń otyrysy ótti. Barlyq tıisti qurylymdarǵa tapsyrma berildi. Osy máselede quqyq qorǵaý organdary halyqtyń kómegi men qoldaýyna ıek artýy qajet»,-dedi ol.
