Astanada tennısten halyqaralyq týrnır ótedi

ASTANA. KAZINFORM – Tennısten Úndistanda ótken týrnırdiń absolıýtti jeńimpazy Jibek Qulambaeva endi Astana qalasynda ótetin Billie Jean King Cup týrnıriniń irikteý kezeńine qatysady. Jarys 10-11 sáýir kúnderi ótedi.

– Úndistanda ótken týrnırde beıimdelý men klımattyq faktorlar qatty áser etti. Dese de psıhologııalyq daıyndyqty kúsheıtip, alǵa shyqtym. Budan soń Billie Jean King Cup týrnırine qatysamyn. Kanada komandasymen synǵa túsemiz. Osy teketireste jeńiske jetken komanda álem chempıonatynyń sheshýshi kezeńine tikeleı joldama alady. Budan bólek, Qytaı men Eýropadaǵy saıystarǵa qatysý josparymda, – dedi Jibek Qulambaeva Jibek Joly telearnasynyń «Búgin Live» baǵdarlamasynda.

Jalpy, Billie Jean King Cup – Qazaqstan quramasy turaqty qatysatyn áıelder arasyndaǵy iri halyqaralyq komandalyq tennıs jarystarynyń biri. Bıyl ulttyq quramanyń jańartylǵan tizimi jasaqtalyp, oǵan komandanyń qazirgi kóshbasshylarymen qatar, bolashaǵynan zor úmit kúttiretin jas tennısshiler engen. Osy úrdis aıasynda eldegi tennıs ınfraqurylymynyń damýy da jańa deńgeıge kóterilip keledi.

Jýyrda Astanadaǵy Ulttyq tennıs ortalyǵy International Tennis Federation tarapynan «Altyn deńgeıli» sertıfıkatqa ıe boldy.

– Bul – álemdik deńgeıdegi tennıs ortalyǵymyz bar degen sóz. Joǵary bilikti mamandar, qatysýshylardyń sany, oǵan barlyǵy áser etedi. Osyndaı belgini alǵan Azııa óńirindegi jalǵyz memleketpiz, – dedi Qazaqstan tennıs federatsııasynyń atqarýshy dırektory Medet Baıken.

Qazaqstan tennıs federatsııasy talantty sportshylardy qoldaýǵa arnalǵan maqsatty baǵdarlamalardy júzege asyryp keledi. Negizgi mindet – úzdik nátıje kórsetip jatqan jas tennısshilerdiń sheteldik týrnırlerge qatysýyna jaǵdaı jasap, olardyń kásibı deńgeıde ósýine múmkindik berý.

Aıta keteıik, bıyl otandyq sportshylar halyqaralyq jarystarda 200 medal jeńip aldy.