Astanada teńizge shyǵa almaıtyn damýshy elder mınıstrleriniń kezdesýi ótti
ASTANA. QazAqparat - Búgin Astanada saýda jáne kólik máseleleri boıynsha teńizge shyǵa almaıtyn damýshy elder mınıstrleriniń konferentsııasy ótti, dep habarlaıdy QazAqparat QR Investıtsııalar jáne damý mınıstrliginiń baspasóz qyzmetine silteme jasap.
Іs-sharaǵa teńizge shyǵa almaıtyn damýshy 32 elden Kólik jáne saýda mınıstrleri qatysty. Sondaı-aq BUU-nyń basqa da halyqaralyq, óńirlik jáne óńirge qarasty uıymdar men qarjy ınstıtýttary, jeke sektor ókilderi, úkimettik emes uıymdar, ǵylymı orta jáne basqa da múddeli taraptar joǵary resmı deńgeıde qatysýǵa shaqyryldy.
Otyrys barysynda teńizge shyǵa almaıtyn damyp kele jatqan elderdegi qol jetkizilgen jetistikterdi, syn-tegeýrinderdi, kóliktik baılanysty damytý múmkindikteri men ozyq tájirıbelerdi, sonymen qatar Vena is-áreket baǵdarlamasyn qabyldaýdan keıingi qatty jáne jumsaq ınfraqurylymdy talqylady.
QR Investıtsııalar jáne damý mınıstri Jeńis Qasymbektiń alǵy sózine sáıkes, álemde teńizge shyǵa almaıtyn 48 el bar. Olar dúnıejúzilik saýda aınalymynyń 90% basym bóligin quraıtyn teńizdik saýda múmkinshiliginen aıyrylǵan.
Osymen birge, Qazaqstan syrtqy saýda kólemin ulǵaıtýda, bul óz kezeginde zamanaýı kólik ınfraqurylymynyń qalyptasýynyń tikeleı kórsetkishi bolyp tabylady.
Búgingi kúnde Qytaıdan Qazaqstan arqyly Eýropaǵa júkter 15 táýlikte tasymaldanady, al Ońtústik teńiz baǵytymen bul merzim 2 aıǵa jýyq ýaqytty quraıdy.
Mınıstrdiń aıtýynsha, Qazaqstanmen atqarylyp kele jatqan jumystar tolyǵymen 2030 jylǵa qoıylǵan talaptarǵa saı keledi, osylaısha turaqty damýdyń jospary damyp kele jatqan elderdiń progresi men bolashyǵyna tikeleı yqpal etedi.
«Turaqty kólik negizgi faktor bolyp tabylatynyn túsinemiz, sondyqtan sońǵy eki jylda ótken kólik jáne saýda boıynsha teńizge shyǵa almaıtyn damýshy elderdiń joǵarǵy deńgeıdegi otyrystarynyń mańyzdy usynystaryn eskerý qajet», - dedi mınıstr.
Saýda-sattyqty jeńildetý boıynsha DSU-nyń kelisimin júzege asyrýdy jedeldetý máseleleri talqylandy.
Mınıstrlik konferentsııasynyń barysynda Deklaratsııaǵa qol qoıyldy. Onyń sheńberinde tranzıttik kólik ınfraqurylymyn damytý, avtojoldarda, temirjolda, porttarda, ishki sý joldarynda, munaı qubyrlarynda, áýe kóliginde fızıkalyq ınfraqurylymdy damytý salalarynda alǵa jyljý kózdelgen.
