Astanada temekige qarsy sharalarǵa 60 mln. teńge baǵyttalady
ASTANA. Mamyrdyń 31-i. QazAqparat /Jasulan Amanbaıuly/ - Astana qalalyq máslıhatynyń sheshimimen 2011-2013 jyldarǵa arnalǵan jalpy bıýdjeti 60 mln. teńgeni quraıtyn «Astana - temeki tútininen arylǵan qala» atty baǵdarlama maquldandy. Bul týraly búgin ákimdikte ótken baspasóz máslıhatynda qalanyń Densaýlyq saqtaý basqarmasynyń bastyǵy Dáýlethan Esimov málim etti,
dep habarlaıdy QazAqparat.
«Temeki tútininen arylǵan Qazaqstan» ulttyq koalıtsııasynyń dırektory Jámılá Sadyqovanyń aıtýynsha, baǵdarlamada aqparattyq baǵytqa úlken kóńil bólingen. Astana ýnıversıtetterinde, mektepterinde jáne jekemenshik uıymdarda temeki zııany týraly qýatty aqparattyq naýqan júrgizilmek.
Astanada qolǵa alynatyn jańashyldyqtardyń biri - qoǵamdyq oryndarda temeki shegýge tyıym salatyn zańnamalardyń oryndalýyna qatysty arnaıy qoǵamdyq baılanys telefondardyń qurylýy. «Árbir qazaqstandyq telefon shalyp, aryz-shaǵym qaldyrýyna bolady. Mysaly, jumysta, úıdiń kireberis dálizderinde temeki shegý faktileri kezdesse, temeki ónimderi jarnamalansa, turǵyndardyń shaǵymy boıynsha olarmen qalalyq ІІD qyzmetkerleri aınalysady», dep atap kórsetti ol.
«Sońǵy 4 jylda elimizdegi temeki shegetin adamdardyń sany 22 paıyzdan 30 paıyzǵa ulǵaıdy. Temeki shegý saldarynan Qazaqstanda bir kúnde 70 adam qaıtys bolady eken. Al álemde jylyna shamamen 25 myń adam ómirden ozady», deıdi D. Esimov.
