Astanada Telegram arqyly esirtki satqan top músheleri sottaldy
ASTANA. KAZINFORM — Kóliktegi polıtsııa departamentiniń qyzmetkerleri Bas kólik prokýratýrasynyń úılestirýimen Astana qalasynda jáne elimizdiń basqa da óńirlerinde «Pitbullshop» Telegram-dúkeni arqyly esirtki zattaryn júıeli túrde satýmen aınalysqan uıymdasqan qylmystyq toptyń áreketin áshkereledi.
Polisia.kz málimetinshe, jedel is-sharalar nátıjesinde 25 pen 40 jas aralyǵyndaǵy 5 kúdikti anyqtalyp, ustaldy.
Top músheleriniń arasynda mindetter naqty bólingen. 35 jastaǵy uıymdastyrýshy qylmystyq áreketterge basshylyq jasap, jetkizilimder men qarjy aǵyndaryn baqylaǵan. 26 jastaǵy qatysýshy operator retinde ınternet-dúkenniń jumysyn júrgizip, ony ilgeriletýmen aınalysqan. Al 25 jáne 40 jastaǵy eki er adam esirtki zattaryn ólshep-orap, jasyryn oryndarǵa ornalastyrýǵa jaýapty bolǵan. Toptyń taǵy bir múshesi esirtkini bólshek saýda arqyly ótkizip, jańa kýrerlerdi tartqan.
Tergeý barysynda toptyń qylmystyq áreketi kezinde shamamen eki myń jasyryn oryn uıymdastyrylǵany anyqtaldy. Zańsyz saýdadan túsken qarajattyń jalpy aınalymy 90 mıllıon teńgeden asqan.
Ótken jyldyń jazynda kúdiktiler ustaldy. Jedel is-sharalar barysynda polıtseıler 165 gramnan astam marıhýana men kannabıs shaıyryn tárkiledi. Sonymen qatar qaptama materıaldary, elektrondyq tarazylar, bank kartalary, aqsha qarajaty jáne qylmystyq árekette paıdalanylǵan ózge de zattar tárkilendi.
Atalǵan fakti boıynsha sotqa deıingi tergep-tekserý júrgizildi. Sot bes aıyptalýshynyń barlyǵyn kináli dep tanyp, top uıymdastyrýshysyn 17 jylǵa, qalǵan tórt qatysýshyny 16 jylǵa bas bostandyǵynan aıyrdy.
Osylaısha, kólik polıtseıleriniń úılesimdi ári kásibı jumysynyń nátıjesinde uıymdasqan qylmystyq toptyń zańsyz áreketine tosqaýyl qoıylyp, esirtki taratý arnasy joıyldy.
Kóliktegi polıtsııa departamenti azamattardy saq bolýǵa shaqyrady. Jeńil ári jyldam tabys tabýǵa ýáde beretin usynystar, sonyń ishinde kýrerlik jumys túrindegi habarlandyrýlar adamdardy esirtki zattarynyń zańsyz aınalymyna tartý úshin paıdalanylýy múmkin. Sondyqtan belgisiz zattar men buıymdardy saqtaý, tasymaldaý nemese jasyryn oryndarǵa ornalastyrý týraly kúmándi tapsyrmalardy oryndaýǵa kelispeńizder.
Esirtki zattarynyń zańsyz aınalymyna qatysqany úshin zańnamada uzaq merzimge bas bostandyǵynan aıyrýǵa deıingi qylmystyq jaýapkershilik kózdelgen.
Buǵan deıin Reseıden Qazaqstanǵa esirtki zerthanalaryn uıymdastyrǵan kúdikti ekstradıtsııalandy.
