Astanada telefon urlyǵy úshin qansha adam ustalǵany belgili boldy
ASTANA. QazAqparat - Astana qalasy Іshki ister departamenti uıaly telefon urylarynan jeke múlikti qorǵaýǵa qatysty keńesterin berdi, dep habarlaıdy QazAqparat.
«Aǵymdaǵy jyl basynan beri Astana qalasynyń polıtseıleri uıaly telefon urlyqtarynyń 586 faktisin ashty. Uıaly telefondardy urlaǵan 512 adam ustaldy. Polıtseıler azamattardan jeke múlkin saqtaýǵa óte saq bolýyn, kóp adamdar jınalǵan oryndarda zattaryn qaraýsyz qaldyrmaýyn, uıaly telefon urlanǵan jaǵdaıda shuǵyl túrde polıtsııaǵa habarlaýyn suraıdy», - delingen ІІD málimetinde.
Sonymen qatar polıtseıler telefon satyp alǵannan keıin onyń qorabyn saqtap qoıýdy nemese IMEI nómirin jazba kitapshasyna jazyp qoıýǵa keńes berdi. Sebebi osy nómirdiń bar bolýy qylmystyń izin sýytpaı ashýǵa múmkindik beredi. Eger telefonnyń shotynda kóp aqsha bolsa, onda uıaly baılanys operatoryna habarlasyp, nómirdi buǵattaý qajet.
«Uıaly telefondardy urlaý búgingi tańda eń kóp taraǵan qylmys túri bolyp otyr. Urlyq kóbinese adamdar kóp jınalatyn oryndarda (saıabaqta, saýda úılerinde, qoǵamdyq kólikterde, oıyn-saýyq mekemelerinde, sport alańdarynda) jasalady. Sport alańdarynda qaraýsyz qalǵan rıýkzaktar men sómkeler qaskúnemder úshin eń jeńil olja bolyp tabylady», - deıdi polıtseıler.
Kóbinese, alaıaqtyq pen tonaý jasaý kezinde uıaly telefondardy jymqyrý jıi oryn alady. Adamdar keı kezde óz telefondaryn beıtanys adamdarǵa qońyraý shalýǵa beredi, al olar bolsa uıaly telefondy alyp, izin sýytady.
Osylaısha «Almaty» aýdany ІІB qyzmetkerleri azamat M. uıaly telefonyn aldaý arqyly ıemdengen kúdiktini ustaǵan. Ol uıaly telefondy qońyraý shalý úshin surap alǵan jáne tabanyn jaltyratqan. Atalǵan fakti boıynsha «alaıaqtyq» babymen sotqa deıingi tergep-tekserý júrgizilýde. Ustalǵannyń basqa da osyǵan uqsas qylmystarǵa qatystylyǵy tekserilýde.
