Astanada «telefon lańkesi» 4 jylǵa sottaldy
ASTANA. QazAqparat - Astana qalasyndaǵy «Jannur» saýda ortalyǵynda jarylǵysh qurylǵy týraly jalǵan aqpar berip, eldi dúrliktirgen azamat 4 jylǵa bas bostandyǵynan aıyryldy. Bul týraly Astana qalasynyń prokýratýrasynan habarlandy.
«Azamat A. mas kúıde óziniń uıaly telefonynan Almaty aýdanynyń ІІB kezekshi bólimine qońyraý shalyp, «Jannur» saýda ortalyǵy ǵımaratynda jarylǵysh qurylǵy qoıylǵany týraly kórineý jalǵan eskertý jasaǵan. Habarlama kelip túsken soń Astananyń barlyq quqyq qorǵaý qyzmetteri tekserýge jumylǵan. Oqıǵa ornyn tekserýdi uıymdastyrý boıynsha materıaldyq shyǵyn 300 000 teńgege jýyq somany qurady. Al sot úkimimen azamat A. kináli dep tanylyp, 4 jylǵa bas bostandyǵynan aıyryldy», - delingen baspasóz baıanynda.
Toqtala ketetin jaıt, byltyrǵy jyly Astana qalasy boıynsha osyndaı «jalǵan terrorızmniń» 14 faktisi tirkelgen eken.
«Barlyq faktiler ashyldy. Qazir jańa tehnıkalyq quraldar, jabdyqtaýlar arqyly kelip túsetin habarlamalardyń ornalasqan ornyn anyqtaý, abonentten túsken árbir qońyraýdy baqylaýǵa múmkindik zor. Osynyń ózi «jalǵan terrorızm» faktileri úshin jazanyń bultartpastyǵyn qamtamasyz etedi», - delingen baspasóz baıanynda.
