Astanada tek elektromobılderge arnalǵan turaq ashylmaq
ASTANA. QazAqparat - Elordada elektromobılderge ǵana arnalǵan kólik turaǵy ashylýy múmkin. Mundaı shara 2018-2020 jyldarǵa arnalǵan qorshaǵan ortany saýyqtyrý jónindegi keshendi josparda qarastyrylǵan. Bul jaıynda Qazaqstannyń Ekologııalyq uıymdary qaýymdastyǵy basqarmasynyń tóraıymy Aıgúl Soloveva aıtty, dep habarlaıdy QazAqparat tilshisi.
«Astananyń 2018-2020 jyldarǵa arnalǵan josparynda elektromobıldi paıdalanýdy yntalandyrý úshin jol qozǵalysyn uıymdastyrý syzbasyn ázirleý jáne bekitý syndy baǵyt qamtylǵan. Sóz tek elektromobılderge arnalǵan arnaıy kólik turaqtary oryndaryn anyqtaý jaıynda bolyp otyr. Mundaı oryndar barlyq áleýmettik mańyzy bar jáne ákimshilik nysandardyń, saýda-oıyn saýyq ortalyqtarynyń janyndaǵy kólik turaǵy oryndary sanynyń keminde 10 paıyzy bolýy tıis», - dedi ol.
Onyń sózine qaraǵanda, 100 elektrmen qýattaý stansasyn ornalastyrý úshin arnaıy oryndardy belgileý josparlanǵan. Al osynaý ilki jobany júzege asyrý «Operator ROP» JShS-ne tapsyrylmaq.
«Qala ákimi Baqyt Sultanov jospardyń osy jáne ózge de sharalaryn júzege asyrý ári oryndaý boıynsha keńesti turaqty ótkizip otyrady. Sońǵy kezdesýde elektroavtobýstar satyp alý jaıy talqylandy. Ol úshin baǵdar aıqyndalyp, jobany júzege asyrýǵa úmitker kompanııa aıqyndalyp jatyr», - dedi Aıgúl Soloveva.
Qaýymdastyq qorshaǵan ortany saýyqtyrý jónindegi is-sharalardyń keshendi josparyn 8 baǵyt boıynsha ázirleýde. Qazirgi ýaqytta qaýymdastyq 10 oblys jáne qalamen yntymaqtastyqta jumys isteıdi.
Avtor: Damır Baımanov
