Astanada tek aýyl balalaryna arnalǵan olımpıada ótip jatyr
ASTANA. QazAqparat - Elordadaǵy Nazarbaev Ýnıversıtetinde «IQanat Bilim berý qory» qoǵamdyq qorynyń respýblıkalyq olımpıadasy bastaldy. Atalmysh olımpıadaǵa Shyǵys Qazaqstan oblysynyń tek aýyldardan iriktelgen 177 oqýshysy qatysýda, dep habarlaıdy QazAqparat tilshisi.
Aıta ketsek, aýyl mektepterindegi oqýshylarǵa Qazaqstan jáne shetel JOO-laryna túsýge qoldaý kórsetý úshin qazaqstandyq demeýshiler tyń bilim berý jobasyn qolǵa alyp otyr. Ol joba - Aıdyn Rahymbaev (BI-group Holdıngtiń Dırektorlar keńesiniń tóraǵasy ), Dáýren Jaqsybek («Tsesna Bank» AQ Dırektorlar keńesiniń tóraǵasy), Armanjan Baıtasov Qazaqstan Medıa Alıans basqarmasynyń tóraǵasy, Islambek Saljanov («Altyn Qyran» korporatsııasynyń negizin qalaýshy), Baýyrjan Isabaev (BI-group hodınginiń dırektorlar Keńesiniń múshesi), Serjan Jumashov - (Capital Partners Capital Partner kompanııasynyń birlesken ıelenýshisi (ıesiniń biri) taǵy basqa bıznesmender toby qurǵan «IQanat» aýyl mektepterine arnalǵan respýblıkalyq bilim berý baǵdarlamasy.
Alǵashqy 6 jylda (2006-2012) baǵdarlama Kaznakovka orta mektebi (ShQO, Kókpekti aýdany) oqýshylaryn kitap oqýǵa degen yntalaryn joǵarylatýǵa baǵyttalǵan. Al 2017 jyl IQanat baǵdarlamasy úshin mańyzdy kezeń boldy. Osy ýaqyttan bastap Shyǵys Qazaqstannyń 6 aýdanynda (matematıka, fızıka, aǵylshyn tili, «Erýdıt» esse konkýrsy jáne jeńil atletıka) 5 baǵyt boıynsha olımpıada ótkizý arqyly, aýyl mektepteriniń úzdik oqýshylaryn irikteý júıesi engizildi. 2017-2018 oqý jyly baǵdarlamasyna qatysý úshin Shyǵys Qazaqstan oblysy 6 aýdanynyń aýyldarynan 200-ge jýyq fınalǵa qatysýshylar irikteledi. Fınalǵa qatysýshylaryna Astana qalasynda ótetin respýblıkalyq ǵylymı-tanymdyq IQanat sletine tegin kelýge, «IQanat» respýblıkalyq pándik olımpıadasyna qatysýǵa, jáne granttar men shákirtaqylar jaıly aqparatqa qol jetkizýge, Qazaqstan jáne shetel JOO-da bilim alýǵa múmkindik beriledi.
«IQanat» qorynyń atqarýshy dırektory Aıjan Sadyqovanyń aıtýynsha, bul - pılotty joba.
«Sebebi, bizdiń maqsatymyz - búkil 160-tan astam aýdandaǵy oqýshy balalarǵa qoldaý bildirgimiz keledi», - deıdi qordyń atqarýshy dırektory.
Onyń aıtýynsha, bul saıys boıynsha tek aýyldaǵy mektepterdiń oqýshylaryna basymdyq beriletin bolady.
«Sebebi, qazirgi tańda aýyl balalary úshin JOO-ǵa túsý ońaı emes. Bizdiń taldaý boıynsha, aýyl balalarynyń tek 20 paıyzy ǵana elimizdegi eń úzdik JOO-larǵa oqýǵa túse alady. Aýyl balalarynyń kóbi aımaqtyq JOO-larǵa nemese kolledjderge túsedi. «Bolashaq» baǵdarlamasy boıynsha shetelge oqý túsý nemese Nazarbaev Ýnıversıteti týraly aıtar bolsaq, munda tipti aýyl balalarynyń paıyzdyq úlesi nólge teń. Sondyqtan, bizdiń maqsatymyz - 10-11 synypta oqıtyn balalardyń JOO-larǵa túsýin qamtamasyz etý, sheteldik granttar týraly olarǵa tolyq málimet berý bolyp tabylady», - deıdi Aıjan Sadyqova.
Qordyń atqarýshy dırektorynyń aıtýynsha, «IQanat» qory aýyl balalary úshin olımpıadany bir ret qana ótkizip qana qoımaı, jylyna tórt ret uıymdastyrady.
«Sonymen birge, biz olımpıadalarǵa daıyndalýǵa bolatyn ádistemelik materıaldardy ázirledik. Bul ádistemelik materıal ýaqyt kórsetip otyrǵandaı, balalar úshin ǵana emes aýyl muǵalimderi úshin de mańyzdy ekenin dáleldep otyr. Demek, biz biz alǵa qadam basqan saıyn bizdiń yqpal etý áserimiz artyp kele jatqanyn baıqadyq. Biz Bilim jáne ǵylym mınıstrligimen memorandýmǵa qol qoıdyq. ıAǵnı, bul kelisim bizdiń olımpıadanyń legıtımdigin qamtamasyz etedi», - deıdi Aıjan Erhanqyzy.
Aýyl balalary úshin ótkizilip jatqan olımpıadalardyń barlyǵy tegin.
