Astanada tek 3 zańdy tulǵanyń 12 saýda ornynda pırotehnıka satýǵa ruqsaty bar - ІІM
ASTANA. QazAqparat - Jeltoqsan aıy bastala sala, Qazaqstannyń naryǵyna Jańa jyl keshine sán beretin dúnıeler ene bastaıdy. Olardyń arasynda kóp satylatyny ári óte qaýip tóndiretini - pırotehnıkalyq zattar.
Olar qazir qalanyń kez kelgen bazarynda satylyp jatyr. ІІM Ákimshilik polıtsııa komıtetiniń ókili Asylbek Ydyrysov arnaıy brıfıngte habarlaǵandaı, Astana qalasy boıynsha tek úsh zańdy tulǵaǵa pırotehnıka satýǵa ruqsat berilgen eken.
«Pırotehnıkalyq zattarǵa lıtsenzııa beretin - Іshki ister mınıstrliginiń ákimshilik polıtsııa komıteti. Búgingi tańda el boıynsha osyndaı lıtsenzııaǵa ıe 26 zańdy tulǵa bar. Astana qalasy boıynsha 3 zańdy tulǵa jumys isteıdi. Elorda aýmaǵy boıynsha osy úsh zańdy tulǵanyń 12 satý ornynda pırotehnıka zattaryn satýǵa ruqsat berilgen»,-dedi ol jýrnalısterdiń suraǵyna jaýap bere otyryp.
Al, jalpy, A.Ydyrysov habarlaǵandaı, 15-30 jeltoqsan aralaǵyndaǵy reıd barysynda el aýmaǵynan 1344 dana pırotehnıkalyq buıymdar joıylǵan.
«Osy jyly 15 jeltoqsannan 30 jeltoqsan aralyǵynda zańdy jáne jeke tulǵalarmen pırotehnıkalyq zarttardy saqtaý, esepke alý, tasymaldaý, joıý, ákelý, áketý talaptarynyń saqtalýyn tekserýge baǵyttalǵan jedel aldyn alý sharalary júrgizilýde. Búgingi tańda respýblıka boıynsha 592 reıd ótti. Sondaı-aq, respýblıkalyq mańyzy bar tas joldarda avtokólikterdiń pırotehnıkalyq zattardy tasymaldaýyn tekserýdemiz. Júrgizilip jatqan is-sharalar barysynda 36 zań buzý faktisi anyqtalǵan. Onyń ishinde azamattyq pırotehnıkalyq zattardy zańsyz ruqsatsyz satqan 30 ákimshilik hattama toltyryldy. Onyń ishinde lıtsenzııasy joq tulǵalarǵa qatysty 22 hattama toltyryldy. Barlyǵy sharany júrgizý barysynda zańsyz aınalymnan 1344 dana pırotehnıkalyq buıym joıyldy»,- dedi óz sózinde A.Ydyrysov.
