Astanada tehnıkalyq bilim alýǵa nıetti stýdentter sany 6% ulǵaıdy
ASTANA. 4 qazan. QazAqparat - Búgin Elordada «Mamandardy kooperatıvti daıyndaý - elordanyń turaqty ekonomıkalyq damýynyń negizi» atty qalalyq forým ótip jatyr. Oǵan jumys berýshiler, QR Bilim jáne ǵylym mınıstrligi, tehnıkalyq jáne kásiptik bilim berý qyzmetkerleri, kásipkerler men depýtattar qatysýda.
«Forýmnyń basty mindeti stýdentterge bilim alǵan tıisti mamandyǵy boıynsha jumys tabýǵa kómektesý bolyp tabylady. Qazirgi tańda tehnıkalyq bilim alýǵa nıetti jastardyń sany 6% artyp otyr. Sonymen qatar, búgin kadrlardy daıyndaýmen aınalysatyndar men kadr izdegender arasynda dıalog alańy qurylmaq», - dedi elordalyq Bilim basqarmasynyń basshysy Ásıma Bımendına.
Forým barysynda salalyq uıymdar, iri kompanııalar men oqý oryndarynyń arasynda kelisimderge, memorandýmdarǵa qol qoıyldy. Budan basqa, shara aıasynda «Áleýmettik jobalar», «Innovatsııalyq jobalar», «Bilim mazmunyn jańǵyrtý» bloktarynan turatyn tehnıkalyq jáne kásiptik bilim berý mekemeleriniń kórmesi uıymdastyryldy.
Forýmda tehnıkalyq jáne kásiptik bilim berý júıesiniń damýyna zor úles qosqany úshin áleýmettik áriptesterdi Astana ákimdiginiń alǵys hatymen, bilikti mamandardy daıarlaýda óndiristik oqytýdyń úzdik sheberlerin gramotalarmen saltanatty marapattaý rásimi ótti. Bul týraly astana.kz habarlady.
