Astanada tehnıkalyq stantsııa órtenip, ıesin kúıik shaldy

ASTANA. KAZINFORM — Oqys oqıǵa Astana qalasynyń Baıqońyr aýdanynda E.Brýsılovskıı kóshesinde boldy, dep habarlaıdy TJM baspasóz qyzmeti.

Astana qalasy TJD bastyǵynyń birinshi orynbasary Baqytjan Máýlenberdıevtiń sózinshe, búgin Astana qalasynyń Baıqońyr aýdanynda E.Brýsılovskıı kóshesinde ornalasqan tehnıkalyq qyzmet kórsetý stantsııasynyń birinde órt shyqty. Saldarynan onyń 2 boksy ashyq jalynmen órtendi. Joǵary dárejeli shaqyrýdy jarııalap, kúshter men quraldardy tez arada arttyrǵannyń nátıjesinde jedel shtab kórshi bokstarǵa órttiń taralý qaýpin joıdy. 250 sh. m. alańdy sharpyǵan órt sóndirildi. 

— Órtten 1 shaǵyn avtobýs pen 1 júk kóligi zaqymdandy. 1986 jyly týǵan jalǵa alýshyny kúıik shalyp, ol aýrýhanaǵa jatqyzyldy, — delingen habarlamada.

Máýlenberdıev atap ótkendeı, órtti sóndirýge jeke quramnan 40 qyzmetker jáne 15 tehnıka jumyldyryldy.

Osyǵan deıin Aqtóbede bir aıda 16 kólik órtenip ketkenin jazǵan edik.