Astanada tehkolledjder arasynda World Skills International formaty boıynsha tuńǵysh ulttyq chempıonat ótedi
ASTANA. QazAqparat - Brazılııada 2015 jyly World Skills International formaty boıynsha ótetin saıystarǵa elimizdiń tehnıkalyq kolledjderi qatysady.
Bul týraly búgin «Kásibı maman daıyndaý strategııasy: problemalary men perspektıvalary» atty pedagog mamandardyń halyqaralyq ǵylymı-tájirıbelik konferentsııasynda QR BǴM kásibı-tehnıkalyq jáne orta bilimnen keıingi bilim berý departamentiniń dırektory Sabyrjan Madeev aıtty.
«10 shildede Qazaqstan álemdegi bedeldi World Skills International uıymyna múshelikke qabyldandy. Bul uıymdy kásibı-tehnıkalyq bilim berý salasyndaǵy Olımpıadalyq oıyn deýge bolady. Osy uıymnyń uıymdastyrýymen eki jyl saıyn álemniń túkpir-túkpirinen kelgen kolledj stýdentteri 40-60 mamandyq boıynsha saıysqa túsedi», - dep atap ótti ol.
Departament dırektorynyń aıtýynsha, osy básekege qatysý úshin elimizdiń kolledjderiniń úzdik stýdentterinen arnaıy komanda jasaqtalady.
«Kelesi jyldyń aqpanynda aımaqtyq saıystar ótkizý josparlanýda. Al sáýirde Astanada World Skills International formaty boıynsha elimizdegi tuńǵysh ulttyq chempıonatty ótkizemiz. Onyń qorytyndysy boıynsha komanda jasaqtalyp, kelesi jyldyń tamyzynda Brazılııanyń San-Paýlý qalasynda ótetin álemdik chempıonatqa jiberiledi», - deıdi S. Madeev.
Mamannyń aıtýynsha, bizdiń komanda birinshi ret bul chempıonatqa konkýrstan tys qatysady. «Biz aldymen ózimizdi kórsetip, tájirıbe jınaımyz. Alaıda qorytyndy reıtıngke enbeımiz. Sosyn 2017 jyly Ábý-Dabıde ótetin chempıonatqa tolyqqandy qatysyp, reıtıng úshin barlyq salalar boıynsha baǵymyzdy synaıtyn bolamyz», - dedi S.Madeev.
