Astanada tegin sport sabaqtary qaıda jáne qashan ótedi
ASTANA. KAZINFORM – «Aulafit» jobasy — qala turǵyndarynyń salaýatty ómir saltyn ustanýyn qalyptastyrý maqsatynda jyl saıyn uıymdastyrylyp kele jatqan iri bastamalardyń biri.
Memleket basshysynyń tapsyrmasyna sáıkes, sondaı-aq balalar men jasóspirimder jáne buqaralyq sportty damytýdy basym baǵyt retinde eskere otyryp, dene shynyqtyrýmen jáne sportpen aınalysatyn azamattardyń sanyn arttyrý maqsatynda Astana qalasynda birqatar arnaıy baǵdarlamalar men jobalar ázirlenip, sátti iske asyp jatyr. Bul týraly Astananyń Kommýnıkatsııalyq qyzmet alańynda ótken brıfıngte Dene shynyqtyrý jáne sport basqarmasy basshysynyń mindetin atqarýshy Azamat Aǵzamov málim etti.
Basqarma basshysynyń aıtýynsha, búginde qala turǵyndaryna tómendegi tegin jobalar qoljetimdi:
1. «Aulafit» sporttyq-áleýmettik jobasy
2. «Ózińnen basta» ózin-ózi qorǵaý boıynsha jattyǵý jobasy
3. Ioga boıynsha tegin oqý-jattyǵý sabaqtary
4. Skandınavııalyq júris boıynsha tegin oqý-jattyǵý sabaqtary
5. «Funny Sport» jazǵy sporttyq jobasy
«Aulafit» jobasy — qala turǵyndarynyń salaýatty ómir saltyn ustanýyn qalyptastyrý maqsatynda jyl saıyn uıymdastyrylyp kele jatqan iri bastamalardyń biri. Astana qalasy ákimdiginiń qoldaýymen júzege asyrylyp kele jatqan bul joba bıyl besinshi jyl qatarynan ótkizilip jatyr.
2025 jylǵy jazǵy maýsymda jattyǵýlar qalanyń 6 aýdanyndaǵy 30 aýla alańynda ótkizilip jatyr. Sabaqtar maýsym aıynan qyrkúıek aıynyń sońyna deıin dúısenbi men senbi aralyǵynda ótedi jáne qatysýshylar úshin tegin. Qatysý úshin jas mólsherine eshqandaı shekteý qoıylmaıdy. Jattyǵý ótetin aýlalardyń kestesi Astana qalasynyń Dene shynyqtyrý jáne sport basqarmasynyń jáne «Aulafit» jobasynyń áleýmettik jelidegi paraqshalarynda jarııalanǵan.
— Ótken jyly bul joba aıasynda 15 kásibı jattyqtyrýshy elordanyń 30 aýlasynda 3 000-nan astam adamdy sportpen qamtydy. Joba alǵash ret 2020 jyly iske qosylyp, salaýatty ómir saltyn nasıhattaý men belsendi demalysty damytýǵa zor úles qosyp keledi, — deıdi Azamat Aǵzamov.
«Astana — esirtkisiz qala» aktsııasy aıasyndaǵy jattyǵýlar. Spıker óz sózinde kúni keshe ǵana «Astana — esirtkisiz qala» atty aktsııa aıasynda elordalyq «Trıatlon» saıabaǵynda beıimdelgen dene shynyqtyrýǵa arnalǵan saýyqtyrý jattyǵýlary resmı túrde bastalǵanyn tilge tıek etti. Úshinshi jyl qatarynan ótkizilip jatqan Vasılıı Tahtaıdyń tegin sabaqtarynyń bıylǵy ereksheligi — «Kóktal» saıabaǵynyń da qosylýy.
Jobaǵa 6 jastan asqan barlyq qala turǵyny qatysa alady. Jas ereksheligine shekteý joq. Tipti múmkindigi shekteýli azamattardyń da belsendilik tanytyp jatqanyn atap ótýge bolady. Sabaqtar 1 qyrkúıekke deıin ár seısenbi, beısenbi jáne senbi kúnderi keshki saǵat 19:00 jáne 20:00–de ótkiziledi.
Ioga jáne skandınavııalyq júris sabaqtary. Tamyz aıynyń basynan bastap qala turǵyndary men qonaqtary úshin ıoga men skandınavııalyq júris boıynsha tegin oqý-jattyǵý sabaqtary bastalady. Sabaqtar qyrkúıek aıyna deıin aptasyna úsh ret, elordanyń alty saıabaǵynda keshki ýaqytta ótedi. Aıtýly tegin oqý-jattyǵý sabaqtarynyń naqty kestesi men tolyq aqparaty basqarmanyń resmı saıty men áleýmettik jelidegi paraqshalarynda jaqyn arada jarııalanatyn bolady.
— «Funny Sport» jazǵy sporttyq jobasy jaz mezgilinde kez kelgen jastaǵy turǵyndarǵa arnalǵan. Saıabaqtar men ashyq qalalyq alańdarda tegin sporttyq is-sharalar, sheberlik synyptary men ınteraktıvti baǵdarlamalar ótkiziledi. Balalardan bastap qart adamdarǵa deıin qatysa alady. Іs-sharalar elordanyń tanymal saıabaqtarynda, atap aıtqanda «Ortalyq», «Trıatlon», «Jetisý» jáne basqa da qoǵamdyq demalys aımaqtarynda turaqty túrde uıymdastyrylady. Jobanyń naqty kestesi men tolyq aqparaty basqarmanyń áleýmettik jelilerinde aldyn ala jarııalanady.
Atalǵan jobalar — Astana qalasynyń turǵyndary arasynda buqaralyq sportty keńinen nasıhattap, densaýlyqty nyǵaıtýǵa jáne qoǵamda belsendi ómir saltyn qalyptastyrýǵa baǵyttalǵan júıeli jumystardyń naqty kórinisi, — deıdi basqarma basshysy.
Aıta ketelik Astanada 2025 jylǵy «Bolashaq oıyndaryna» irikteý bastalǵan edi.