Astanada tegin parakarate sektsııasy ashyldy
ASTANA. QazAqparat - Jyl basynan beri Astanada qala ákimdigi janynan «Balalar-jasóspirimder sport mektebi, múgedek sportshylarǵa arnalǵan sport mektebi» óz jumysyn bastady. Bul týraly QazAqparat Mádenıet jáne sport basqarmasyna silteme jasap habarlaıdy.
Mektepte 18 sport túrinen jattyǵýlar ótkiziledi. Atap aıtqanda, arbada otyryp bı bıleý, otyryp oınaıtyn voleıbol, grek-rım kúresi, erkin kúres, doıby, shahmat, toǵyzkumalaq, jeńil atletıka, júzý, paýerlıftıng, ústel tennısi, fýtbol, taekvondo, asyq atý, dzıýdo, bochcha jáne golbol. Aqpan aıynda mektep janynan taǵy da bir sektsııa ashyldy. Onda múmkindigi shekteýli jandar karate-do ónerin meńgeredi.
Top jetekshisi karate-dodan Qazaqstannyńeńbek sińirgen jattyqtyrýshysy Meıramgúl Dýkýeva. Sportshy 15 jyldan beri elordalyq karateshilerdi respýblıkalyq jáne halyqaralyq jarystarǵa daıyndap júr. Parakarate sektsııasyn ashý ıdeıasy 2017 jyly Londonda Álem chempıonatynda Reseıdiń tanymal parakarateshisi, Álem chempıony Sergeı Býrlakovpen tanysqanda týǵan. Múmkindigi shekteýli sportshy «katany» tizemen otyryp jasaǵan.
«Londonda júrgende parakarateni nege Qazaqstanda da damytpasqa degen oı keldi. Men múmkindigi shekteýli jandardy izdeı bastadym. Іzdemegen jerim joq, ınternetten de qaradym, túrli qoǵamdarǵa da bardym. Sonda bireýler maǵan kórý qabileti buzylǵan balalar bilim alatyn medıtsınalyq kolledjge barýǵa keńes berdi. Alǵashqy shákirtterimdi osylaı taptym. Bıyl jeltoqsan aıynda Londonda Álem chempıonaty ótedi. Oǵan qatysý úshin respýblıkalyq chempıonatta irikteýden ótý kerek. Buryn-sońdy mundaı jarys elimizde bolmaǵan - Qazaqstandaǵy parakarateniń tarıhyn biz bastap otyrmyz», - dedi Meıramgúl Dýkýeva.
Parakarateniń ereksheligi - sportshylar tóbelespeıdi, olar karate-doda paıdalanylatyn tehnıka «katalardy» oryndaıdy.
«Basynda qoryqtym, kózi kórmeıtin sportshylar úshin alańdadym, olar qalaı sekiredi, qalaı júgiredi eken? Alaıda, olar tabandylyq tanytty. Esh qorqýdyń qajeti joq. Bastysy, alǵashqy qadam jasaý kerek. Múmkindigi shekteýli jandarǵa aıtarym, topqa kelip, jazylyńyzdar! Kelińizder, kórińizder! Naýryz aıynda Aqtóbede halyqaralyq týrnırge qatysamyz dep otyrmyz, jan-jaqty qoldaý kórsetip, qol ushyn sozǵany úshin Astana qalasynyń mádenıet jáne sport basqarmasyna alǵysymdy bildiremin», - dedi karate-dodan Qazaqstannyń eńbek sińirgen jattyqtyrýshysy Meıramgúl Dýkýeva.
Aıta keteıik, parakarateshiler jańa Paralımpıadalyq jattyǵý ortalyǵynda daıyndalady. Qazirgi kezde topta 15 adam bar. Olar arbaǵa tanylǵan sportshylar, mentaldi múgedekter jáne kórý organdary buzylǵan jandar. Eń jas parakarateshiniń jasy 14-te, eń úlkeni - 36-da. Sport mektebi shákirtterdi kelip-ketýin de qamtamasyz etedi. Parakarateshilerdiń jattyǵýǵa degen yntasy mol, olardyń armany - jaqynda paralımpıadalyq oıyndarǵa qatysý.
Aıta ketsek, 2019 jyldyń 1 qańtarynan bastap Astananyń múmkindigi shekteýli jandany múgedektiginiń tobyna jáne jasyna qaramastan Paralımpıadalyq jattyǵý ortalyǵynda tegin jattyǵý múmkindigine ıe.Bul úshin múgedektigin rastaıtyn anyqtama, meken jaı anyqtamasy jáne jeke kýálik sııaqty qujattar ǵana qajet.
