Astanada teatr maıtalmandary kásibı merekelerin atap ótti
ASTANA. 27 naýryz. QazAqparat - Búgin Astanada Halyqaralyq teatr kúnine oraı, Beıbitshilik jáne kelisim saraıynda merekelik kontsert ótkizilip, onda qalanyń úzdik akterleri men aktrısalary marapattaldy.
Osy ataýly kúnge baılanysty teatr ónerpazdaryna qala ákimi Imanǵalı Tasmaǵambetov arnaıy quttyqtaýyn joldady.
«Óner salasynyń ishinde teatrdyń alar orny qashanda bólek. Kórermen kóńilin nurǵa, júregin jyrǵa bóleıtin de, qoǵamnyń rýhyna dem, ishki jan dúnıesine em beretin de - teatr óneri. Endeshe, elorda halqynyń talǵamyn tárbıelep, rýhanı baıyta túsýge qyzmet etip kele jatqan Astana qalasynyń teatr ujymdaryna eńbekterińiz jansyn demekpin!», - delingen Astana ákiminiń quttyqtaý sózinde.
Sonymen qatar merekelik kontsert barysynda Astana qalasynda teatr óneriniń damýyna súbeli úlesterin qosyp kele jatqan birqatar akterler men ujym jetekshilerine elorda ákiminiń alǵys hattary tabys etildi.
Aıta keteıik, qazirgi kúni Astanada 7 teatr jumys isteıdi. Elordanyń alǵashqy jyldarynda qalada tek eki teatr bolǵan. Onyń biri - 100 jyldan astam tarıhy bar M.Gorkıı atyndaǵy Orys drama teatry. Sózsiz atalmysh mádenıet ordasy bir ǵasyrdan astam ýaqyt ishinde talaı ozyq-ozyq sahnalyq qoıylymdardy kórermen nazaryna usyndy. Búgingi repertýary jergilikti avtorlarmen qatar, álemdik jáne orys klassıkteriniń týyndylarymen óte baı. 1991 jyldyń 15 qarashasynda Astana qalasynyń Q.Qýanyshbaev atyndaǵy Memlekettik akademııalyq qazaq mýzykalyq drama teatry ashyldy. Atalǵan óner oshaǵy alǵash ashylǵaly beri teatr ujymy árdaıym izdenis ústinde. Ujymnyń alǵa qoıǵan maqsaty da kózi qaraqty kórermenge sapaly qoıylym qoıyp, salt-sanamyzǵa saı spektakl usyný. Bas qalamyzdyń mádenı ómiriniń damýyna óz úlesin qosyp kele jatqan ujymnyń taǵy biri - «Naz» bı teatry. 1999 jyly Memlekettik fılarmonııa janynan «Naz» halyq bıiniń kásibı ansambli retinde qurylǵan teatr, búginde «Shabyt» halyqaralyq baıqaýynyń bas júldegeri, Shara Jıenqulova atyndaǵy baıqaýdyń tuńǵysh jeńimpazy jáne Qazaqstan jastar syılyǵynyń laýreaty atanyp otyr. Elordada 2006 jyly «Terra» bı teatry quryldy. Onyń shyǵarmashylyq ujymy bı óneriniń san-alýan túrli baǵytyn meńgergen. Óner oshaǵy myń buralǵan talantty qyzdardan jasaqtalǵan. Olardyń enshisinde 80-ge jýyq bı bar. 2007 jyly Astana teatrlarynyń qataryna jáne bir jas teatr qosyldy. Aty aıtyp turǵanyndaı, Astana qalalyq jastar teatry elordanyń óskeleń urpaǵyna etıkalyq jáne estetıkalyq kózqarasqa tárbıeleý jáne kórermenniń patrıottyq rýhta tálim alýyna yqpalyn tıgizetindeı qazirgi zamanǵy qoıylymdarmen qamtamasyz etýde.
Búldirshinder kóńilin baýrap alǵan ujymdardyń biregeı - elordanyń Qýyrshaq teatry deýge bolady. Birneshe jyl buryn qurylǵan teatrdyń balalar nazaryna usynylatyn shyǵarmalary jas búldirshinderdiń psıhologııalyq erekshelikterin eskere otyryp, tańdalyp alynǵan. Qýyrshaq teatrynyń jalpy qoǵamdyq máni zor. Sebebi ol adamdardy jastaıynan sezimtaldyqqa, rýhanı tazalyqqa baýlıdy.
Erekshe atap ótetin ujymdardyń biri - Astana kóńildi tapqyrlar teatry. Bul ujym negizinen qalyń qazaqqa «Bazar joq» atymen jaqsy tanys. Ózderiniń ádemi ázilderimen el-jurttyń kóńilin tapqan kóńildi tapqyrlar teatrynyń jetekshisi - Tursynbek Qabatov.
Eske sala keteıik, Dúnıejúzilik teatr kúni 1961 jyly Halyqaralyq teatr ınstıtýtynyń ІH kongresimen bekitildi jáne jyl saıyn 27 naýryz kúni ІTІ Ortalyqtarmen jáne halyqaralyq teatr qoǵamdastyqtarymen atap ótiledi.
Dúnıejúzilik teatr kúnine arnalǵan alǵashqy halyqaralyq úndeýdi 1962 jyly frantsýz jazýshysy jáne sýretshisi Jan Kokto jazdy.
