Astanada tájikstandyq ónimder men buıymdardyń jármeńkesi ótip jatyr
ASTANA. KAZINFORM – Elordada Tájikstan Respýblıkasynyń Soǵdy oblysynan ákelingen aýylsharýashylyq ónimderi men qolóner buıymdarynyń jármeńkesi ashyldy, dep habarlaıdy elorda ákimdiginiń resmı saıty.
Tájikstannan kelgen kásipkerler myń tonnadan astam aýylsharýashylyq ónimderin satylymǵa usyndy. Onyń ishinde jańa pisken jemis-jıdek pen kókónister, keptirilgen jemister, jańǵaqtar jáne baqsha daqyldary bar.
Kelýshiler sondaı-aq ǵasyrlar boıǵy dástúrdi saqtaǵan tájik qolóneriniń biregeı buıymdaryn satyp ala alady.
Jármeńkede ulttyq taǵamdar da satýǵa usynylǵan. Kún saıyn 10 qazanda keminde 1 tonna palaý daıyndalyp, 6 tandyrda 5 myńnan astam nan men samsa pisiriledi.
Sonymen qatar uıymdastyrýshylar Tájikstannan kelgen ártister men shyǵarmashylyq ujymdardyń qatysýymen erekshe kontserttik baǵdarlama ázirledi.
Іs-sharanyń basty maqsaty – shaǵyn jáne orta bıznestegi memleketaralyq yntymaqtastyqty damytý men qoldaý, sondaı-aq eki el arasyndaǵy mádenı jáne ekonomıkalyq baılanysty nyǵaıtý.
– Bul – tek bazar emes, naǵyz mádenı oqıǵa. Mundaǵy atmosfera sondaı erekshe, shynymen de shyǵys bazarynda júrgendeı áser qaldyrady. Biz munda tek ónimder men kádesyılar alyp qana qoımaı, tájik mádenıetiniń rýhyn sezindik, - dedi is-shara qonaqtarynyń biri.
Jármeńke 16 tamyz kúni saǵat 11:00-den 19:00-ge deıin, al 17 tamyzda 10:00-den 19:00-ge deıin «Barys Arena» muz saraıynyń aldyndaǵy alańda (Turan dańǵyly, 57) ótedi.
Buǵan deıin Astanada Tájikstan ónimderiniń jármeńkesi ótetinin habarlaǵan bolatynbyz.