Astanada tájik-aýǵan shekarasynda erlikpen qaza tapqan 17 jaýyngerdi eske alý kúni ótti
ASTANA. 7 sáýir. QazAqparat /Jasulan Amanbaıuly/ - Búgin Astanada 16 jyl buryn tájik-aýǵan shekarasyn qorǵaý jónindegi TMD elderiniń bitimgershilik mıssııasyn oryndaýda qaza bolǵan qazaqstandyq jaýyngerler alleıasynda gúl shoqtaryn qoıý rásimi ótti.
Otan qorǵaýshylar saıabaǵynda tájik-aýǵan shekarasynda erlikpen qaza tapqan 17 jaýyngerdi Eske alý alleıasynda erlerdiń esimderin qurmetteý rásimine QR ІІM ortalyq apparaty, Іshki áskerler qolbasshylyǵynyń basshylary, Májilis depýtattary, ardagerler, «Nur Otan» HDP ókilderi qatysty.
1993 jyly TMD memleket basshylary Tájikstan eliniń Aýǵanstanmen shektesetin qorǵaýsyz qalǵan shekarasyna ásker jiberý týraly sheshim qabyldaǵan bolatyn. 1993-1999 jyldar aralyǵynda elimizdiń Іshki áskeri jedel maqsattaǵy bóliminiń 2 myńnan astam jaýyngeri men ofıtseri Qazaqstan Respýblıkasynyń jeke atqyshtar batalonynyń quramynda tájik-aýǵan shekarasynda jaýyngerlik mindetterin oryndady.
Jaýyngerler TMD shekarasynyń ońtústik shebin, Aýǵanstanmen shektesetin eń aýyr jáne qıyn ýchaskeniń tynyshtyǵyn kúzetti. Olardyń basty maqsaty - jalpy saıası jaǵdaıdyń turaqtanýyna deıin, tájik-aýǵan shekarasyndaǵy ahýaldy retke keltirý. Sonymen qatar gýmanıtarlyq kómek taýarlarynyń jetkizilimin qamtamasyz etý jáne qorǵaý, bosqyndardyń qaýipsiz jetýin qadaǵalaý, mańyzdy nysandardy qorǵaý boldy.
Eń joıqyn qaqtyǵys 1995 jyly Pamır taýlaryndaǵy Pshıhavr shatqalynda oryn aldy. Onda 17 qazaq jigiti sodyrlarmen bolǵan atysta kóz jumǵan bolatyn. Qazirgi kezde olardyń erligi elenip, eldiń árbir óńirlerinde eskertkishter, mektepter men alleıalar boı kóterýde.
Jalpy sol mıssııada memlekettik múddeni alǵa qoıyp, shekara tynyshtyǵyn kúzetken TMD áskeri 356 jaýyngerinen aıyryldy. Sonyń ishinde 54-i -qazaqstandyq áskerı qyzmetshiler. Qazaq jaýyngerleri 8 jyldan keıin 2001 jyly 8 aqpan kúni elge oraldy.
QR Prezıdenti N.Nazarbaevtyń Jarlyǵymen qaza tapqan jaýyngerlerdiń beseýi 2-dárejeli «Aıbyn» ordenimen, 12-si «Jaýyngerlik erligi úshin» medaldarymen marapattaldy.
