Astanada Tazarý kúnine oraı ekologııalyq is-sharalar ótedi
ASTANA. KAZINFORM – «Naýryznama» onkúndiginiń sońǵy kúni – 23 naýryz Tazarý kúnine arnaldy. Osyǵan oraı Astanada «Ózińnen basta» chellendji bastaý alady, dep habarlaıdy elorda ákimdiginiń resmı saıty.
Atap aıtqanda, qalada eriktilerdiń qatysýymen jalǵyz turatyn zeınetkerler men múmkindigi shekteýli jandardyń aýlalaryn qar men qoqystan tazartýǵa arnalǵan qaıyrymdylyq aktsııasy uıymdastyrylady.
Sondaı-aq «Taza Qazaqstan» jalpyulttyq ekologııalyq aktsııasy aıasynda aýlalardy qar men qoqystan tazartý jumysy júrgiziledi. Bul – jańa jyldy jańa maqsatta qarsy alýdyń sımvoly.
Іs-sharalar qorshaǵan ortanyń jaǵdaıyn jaqsartýǵa, turǵyndardy tabıǵatty aıalaýǵa yntalandyrýǵa jáne turǵylyqty jerdiń tazalyǵyna jaýapkershilikti arttyrýǵa baǵyttalǵan.
Tańerteń Astanada «Tabıǵat – adamzattyń altyn besigi» atty ekoaktsııa bastalady.
Aıta keteıik, Astanada Naýryz meıramy keń kólemde atap ótildi: qala boıynsha ulttyq taǵamdar jármeńkeleri, kontsertter, túrli is-sharalar, sport jarystary men zamanaýı ınteraktıvti alańdar uıymdastyryldy. Mereke dástúr men jańa tehnologııalardy ushtastyryp, qala turǵyndary men qonaqtary úshin erekshe áserli atmosfera qalyptastyrdy.
Budan buryn Naýryz meıramyna oraı Astanada aýqymdy dron-shoý ótkenin jazǵan edik.
