Astanada tazalyqty baqylaý kúsheıtildi: drondar men kameralar iske qosyldy
ASTANA. KAZINFORM – Elordada qoǵamdyq oryndardyń tazalyǵyn baqylaý jumystary kúsheıtilip, zamanaýı tehnologııalar keńinen qoldanylyp jatyr. Bul týraly Polıtsııa departamenti málim etti.
Vedomstvonyń dereginshe, qoǵamdyq oryndardy lastaý faktileriniń aldyn alý jáne jolyn kesý baǵytynda túsindirý jumystary júrgizilip, quqyq buzýshylarǵa qatysty ákimshilik sharalar qabyldanýda.
Aıta keteıik, belgilenbegen oryndarǵa qoqys tastaý, temeki tuqylyn laqtyrý, jerge túkirý, sondaı-aq kólik terezesinen qoqys laqtyrý áreketteri úshin zańnamada ákimshilik jaýapkershilik kózdelgen.
Atalǵan jumys «Taza Qazaqstan» ekologııalyq aktsııasy aıasynda turaqty túrde júrgizilýde. Jyl basynan beri qoǵamdyq oryndardy lastaý jáne abattandyrý erejelerin buzý boıynsha shamamen 16 myń derek tirkelgen.
Quqyq buzýshylyqtardy anyqtaý úshin Operatıvti basqarý ortalyǵynyń beınekameralarymen qatar drondar da qoldanylyp jatyr. Olar quqyq buzýshylyqtardy tirkep, patrýldik qyzmetterge jedel aqparat beredi.
Sonymen birge drondar arqyly azamattarǵa qoǵamdyq tazalyqty saqtaý, qala múlkine uqypty qaraý jáne qoǵamdyq tártipti saqtaý týraly dybystyq eskertýler jasalady.
Polıtsııa qala turǵyndary men qonaqtaryn jaýapkershilik tanytýǵa shaqyryp, tazalyq mádenıetin qalyptastyrý ár azamattyń mindeti ekenin atap ótti.
Aıta keteıik, Pavlodar ormandarynda órtke qarsy baqylaýǵa drondar jumyldyryldy.
