Astanada tazalyq pen tártip qalaı qamtamasyz etiledi
ASTANA. KAZINFORM – Elordada tazalyq pen qaýipsizdikti qamtamasyz etý maqsatynda ekologııalyq aktsııalar, beınebaqylaý júıeleri, jasandy ıntellekt elementteri bar tsıfrlyq platformalar jáne kommýnaldyq ınfraqurylymdy basqarýdyń zamanaýı tetikteri keshendi túrde qoldanylýda.
Bul sharalar qoǵamdyq tártipti nyǵaıtýǵa, abattandyrý qaǵıdalarynyń saqtalýyn baqylaýǵa jáne qala turǵyndary úshin jaıly ári qaýipsiz orta qalyptastyrýǵa baǵyttalǵan. Bul týraly elordanyń Kommýnıkatsııalar qyzmetinde ótken brıfıngte Astana qalasy Qorshaǵan ortany qorǵaý jáne tabıǵatty paıdalaný basqarmasy basshysynyń orynbasary Medet Jalpybaev pen Astana Smart City Jaǵdaıattyq ortalyǵynyń basqarýshy dırektory Aıbek Ahmetbekov málimdedi.
Medet Jalpybaevtyń aıtýynsha, jyl basynan beri Astanada «Taza Qazaqstan» aktsııasy aıasynda 250-den astam ekologııalyq is-shara uıymdastyrylǵan. 11 sáýir men 16 mamyr aralyǵynda ótken ekologııalyq aılyqqa 300 myńnan astam turǵyn qatysty.
Sonymen qatar, abattandyrý qaǵıdalaryn buzý faktilerin anyqtaý jáne ruqsat etilmegen qoqys oryndaryn joıý boıynsha turaqty jumys júrgizilýde.
- «Ǵarysh Sapary» AQ ǵaryshtyq sýretterine júrgizilgen monıtorıng nátıjesinde Astanada qaldyqtar zańsyz ornalastyrylǵan 122 oryn tirkeldi. Onyń ishinde 68 ýchaske joıyldy, al 54 ýchaskede jumystar jalǵasýda.
Almaty, Esil jáne Saryarqa aýdandarynda anyqtalǵan barlyq ýchaske tolyqtaı joıyldy. Nura aýdanynda jumys jalǵasyp jatyr.
Astana qalasynyń Qorshaǵan ortany qorǵaý jáne tabıǵatty paıdalaný basqarmasy Polıtsııa departamentimen, «iKomek» 109 qyzmetimen jáne aýdan ákimdikterimen birlesip, abattandyrý qaǵıdalaryn buzý jáne qoqysty zańsyz tógý faktilerin anyqtaý boıynsha kún saıyn monıtorıng júrgizedi, – dedi spıker.
Aıbek Ahmetbekovtiń aıtýynsha, qalanyń biryńǵaı tsıfrlyq júıesine 60 myńnan astam beınebaqylaý kamerasy qosylǵan. Júıege jasandy ıntellekt negizindegi beıneanalıtıkanyń 35-ten astam stsenarııi kezeń-kezeńimen engizilýde.
Kameralar qoǵamdyq oryndardy lastaý, qoqysty zańsyz tógý, vandalızm áreketteri, aıaldama pavılondary men abattandyrý elementterin búldirý, zańsyz saýda jasaý jáne qoǵamdyq tártipti buzý faktilerin anyqtaýǵa múmkindik beredi.
Aıbek Ahmetbekovtiń aıtýynsha, jasandy ıntellekt yqtımal quqyq buzýshylyqtardy ǵana anyqtap, operatordyń nazaryn aýdarady. Sońǵy sheshimdi ýákiletti qyzmetkerler qabyldaıdy.
Kommýnaldyq qyzmetterdiń kameralary, datchıkteri jáne GPS júıeleri Jaǵdaıattyq ortalyqqa biriktirilgen. Árbir oqıǵa boıynsha jumys mynadaı algorıtmmen júzege asyrylady: oqıǵa avtomatty túrde nemese qolmen tirkeledi, operator aqparatty tekseredi jáne ony jaýapty qyzmetke joldaıdy, sodan keıin tapsyrmanyń oryndalýy júıe arqyly baqylanady.
Qazirgi ýaqytta ortalyqqa 18 jedel, kommýnaldyq jáne ózge de qyzmet qosylǵan.
- 2026 jyldyń jeti aıynda abattandyrý jáne sanıtarııalyq tazalyq qaǵıdalaryn buzǵany úshin 30,2 myń quqyq buzýshy ákimshilik jaýapkershilikke tartyldy. Onyń ishinde qoǵamdyq oryndardy lastaǵany úshin – 585, abattandyrý qaǵıdalaryn buzǵany úshin – 29 641, kólik quraldaryn paıdalana otyryp qoqys tókkeni úshin 33 quqyq buzýshy jaýapqa tartyldy.
Elordada kommýnaldyq qaldyqtardy basqarýdyń ortalyqtandyrylǵan júıesi jumys isteıdi. Ol qaldyqtardy jınaý, tasymaldaý, suryptaý jáne kómý sııaqty tolyq tsıkldi qamtıdy. 2026 jyldyń jeti aıynda 200 myń tonnadan astam kommýnaldyq qaldyq shyǵaryldy.
Qalada Waste Management aqparattyq júıesi jumys isteıdi. Ol naqty ýaqyt rejıminde konteınerler men konteıner alańdarynyń sany jáne tehnıkalyq jaı-kúıi týraly aqparat alýǵa múmkindik beredi. Júıede 19 myńnan astam konteıner men 4,8 myń konteıner alańy tsıfrlandyrylǵan. GPS datchıkterimen jabdyqtalǵan 116 arnaıy tehnıka jumyldyrylǵan, – dep qorytyndylady Medet Jalpybaev.
Aıta ketelik Astanada robot-kýrerler tapsyrys jetkize bastaǵan edi.
