Astanada «Taza sana – Taza qala» baıqaýynyń jeńimpazdary marapattaldy
ASTANA. KAZINFORM — Búgin Táýelsizdik kúni qarsańynda jáne «Jumysshy mamandyqtar jyly» aıasynda otandyq buqaralyq aqparat quraldary ókilderi men bloger arasynda ótken «Taza sana — Taza qala» baıqaýynyń qorytyndysy shyqty.
Baıqaý 2025 jylǵy 1 qarasha men 10 jeltoqsan aralyǵynda ótkizilip, oǵan 122 jýrnalıst, bloger jáne shyǵarmashylyq tulǵalar qatysyp, 150-den astam materıal usyndy.
Onyń maqsaty — elordadaǵy tazalyq pen tártipti kún saıyn qamtamasyz etip júrgen kommýnaldyq sala qyzmetkerleriniń eńbegin nasıhattaý.
Baıqaý «Jumysshy mamandyqtar jylynyń» aıasynda eńbek adamdarynyń mártebesin arttyrýǵa, sondaı-aq, Astana qalasynyń, onyń shet aımaqtary men eldi mekenderiniń sanıtarııalyq jaǵdaıyn qamtamasyz etý taqyrybyn ashýǵa baǵyttalǵan.
Saltanatty jıynda «Astana Tazalyq» JShS Bas dırektory Zamır Sagınov sóz sóılep, el Prezıdenti jarııalaǵan «Jumysshy mamandyqtar jylynyń» mańyzyn atap ótti.
— Bıyl 2025 jyldy Prezıdentimiz «Jumysshy mamandyqtar jyly» dep jarııalady. Bul — kún saıyn qalany tazalap, kósheni jýyp, qoǵam úshin únsiz eńbek etip júrgen qarapaıym jumysshynyń abyroıyn kóterý degen sóz. Artqa kóz salsaq, aǵymdaǵy jyly «Astana Tazalyq» týraly aqparat keńistiginde 487 materıal jaryq kórdi. Sonyń 370-i — qarapaıym qyzmetkerler týraly. ıAǵnı, BAQ ókilderi kún saıyn bir jumysshynyń eńbegin elge kórsetip otyrdy. Bul úlken eńbek, — dedi ol.
Sagınovtyń aıtýynsha, bıylǵy baıqaýǵa qatysýshylar sany ótken jylmen salystyrǵanda eki esege artqan. Bul qoǵamda taqyryptyń ózektiligi joǵary ekenin jáne buqaralyq aqparat quraldarynyń oǵan belsendi túrde ún qosqanyn kórsetedi.
Baıqaý jumystary kelesi negizgi krıterııler boıynsha baǵalandy:
1. Taqyryptyń ózektiligi men qoǵamdyq mańyzdylyǵy;
2. Materıaldyń tereńdigi men shynaıylyǵy;
3. Jazý stıli men qurylymynyń sapasy;
4. Avtorlyq kózqaras pen shyǵarmashylyq erekshelik.
Qazylar alqasynyń quramynda aqparat salasynyń tanymal ókilderi boldy. Olar úzdik jumystardy iriktep, avtorlardyń eńbegin joǵary baǵalady.
«Astana Tazalyq» JShS bul baıqaýdy jyl saıyn dástúrli túrde ótkizip, ekologııa, eńbek adamy jáne qalanyń kórkeıýine úles qosyp júrgen jýrnalısterdiń shyǵarmashylyǵyn qoldaýǵa múddeli.
Jeńimpazdar men júldegerlerge brendtik syılyqtar men marapattar tabys etildi. Bul baıqaý ekologııa men tazalyq máselelerine qoǵamnyń nazaryn aýdarý maqsatynda uıymdastyrylyp, qala tazalyǵyn jaqsartýǵa úles qosqan úzdik jýrnalıstik jumystardy marapattady.
Budan buryn elordada jumysshy mamandyqtar baıqaýynda «Astana Tazalyq» kósh bastaǵanyn jazǵan edik.