Astanada taıǵaq jolda qulaǵan áıelge ota jasaldy
ASTANA. QazAqparat - Astanada taıǵaq jolda qulap jaraqat alǵan 73 jastaǵy Roza Saparbaevaǵa sátti ota jasaǵan dárigerlerge týystary áleýmettik jelide rızashylyq bildirip jatyr, dep habarlaıdy «QazAqparat» HAA.
«Astana qalasy ákimdiginiń №2 qalalyq aýrýhananyń dárigerleri - dáriger-travmatologtar Málik Birjan Qaıyrbekuly men Tóleýhanov Beıbit Omarǵazyulyna, dáriger-anestezıolog Medeýova Bıbish Salyqqyzyna, sondaı-aq travmatologııalyq bólimniń, búkil aýrýhananyń qyzmetkerlerine joǵary kásibı biliktiligi, kómegin aıamaı, qoldaǵany, meıirban anamyz, súıikti ájemiz Saparbaeva Rozanyń densaýlyǵy men ómiri saqtap qalǵany úshin alǵys aıtamyz», - dep jazdy Feısbýkte Mahabbat Saparbaeva esimdi paıdalanýshy.
«73 jasqa kele jatqan anamyz úıdiń aldyndaǵy taıǵaq jolda qulap, jambasyn qatty zaqymdap aldy. Egde jasta jambastyń synýy qanshalyqty qıyn bolatynyn jurttyń bári biledi. Arty ne bolaryn bilmeı qatty ýaıymdadyq, biraq esimderi atalǵan kásibı mamandar bizdi operatsııanyń qajet ekenine kóndirdi. Bar jaǵdaıdy tarazyǵa salyp baıqap, 11 qańtarda kúrdeli ota jasady. Kúrdeli deıtinimiz, anamyzdyń júregi otaǵa tóze almaýy múmkin edi. Sizderge kóp alǵys, eren eńbekterińiz ben kómek qolyn sozǵandaryńyz úshin bas ıemiz», - dep, dárigerlerge alǵysyn jaýdyrdy Astana turǵyny.
